Башкириысь «Янган-Тау» геопарке вуыса, трос тунсыкозэ адӟод

Салават ёрос пумитаз

Кылем гужем ми «Янган-Тау» геопаркез асьмелы «усьтӥм». Картаез пыр-поч эскерим, интернетын «бугыръяським», Салават ёросын кыӵе интыосты учкыны луэ шуыса. Нош шутэтскон нуналъёсы ини сюрес вылэ потӥм. Ньыль часлы матэ кыстӥськись сюресмы милемыз «Янган-Тау» геопарке вуттӥз.

- Мон республикаетӥ трос ветлӥськоё Соин од.г интыез мукетэныз ӵошатыны быгатӥсько, - вера Башкортостанлэн тӧроез Радий Хабиров. – Асьмелэн гуртъёсмы, городъёсмы шӧдскымон воштӥсько: паркъёс, скверъёс, аллеяос, шутэтскон интыос кылдо. Берлось вить ар куспын «Формирование городской среды» программая республикаын 983 объект тупатэмын. Проект улсын висъяськем 7 млрд манет коньдонлэн 91%-эз федерал бюджетысь пыремын.

Нырысь «Кургазак» источнике дугдӥм. Татысь визит-центрын маршрутэн тунсыкъяським. 

Милемлы ӵектӥзы Идрисовская пещерае вуылыны. 45 метр ӝуждалае тубем бере, сокем чебер суред усьтӥське. 

Вуоссэ кыдёке-кыдёке нуись Юрюзань кырым пыдэсын выллем адске. Со котыръяськыса вия. 

Гурезьын шоканы капчи, пещера выль кужым сётэ кадь. Астэ инмын лобась ӧрӟи выллем кожаськод. Син сузёнтэм нюлэсъёс, вераса быдтонтэм чебер инкуазь суредъёс – соос пыраклы тодэ кылё.

Вераны кулэ, пещерае тубыса васьконэз секыт ӧвӧл. Гурезьысь изъёс тубат выллемесь. 

Собере Яхинской водопадэ  вуылӥм.

Текеевое нуись сюресэз ширтыса ӧм ортче

«300 иськемлэсь ятыр сюресэз ортчыса татчы лыктӥмы бере, Салават Юлаевлэн музеяз кожылоно», - малпамы ми. Малоязысь шаертодонъя музейын ужась калык герой сярысь трос тунсыкозэ мадиз, солэн вордскем интыез сярысь но вераз, отчы мыныны ӵектӥз.

Азьпалтыса верало, Текеевое нуись сюресэз ширтыса гинэ ортчыны ӧз пӧрмы. Йыромыса но ветлӥм: навигатор мукет сюресэ но лэзьылӥз, куд-ог дыръя ньыльнамылэн навигатормы ньыль пала возьматъяз. Связь, интернет сярысь веранэз ик ӧвӧл.

Тани Алькино гуртэз ортчыса, бусы сюресэ кожим. Пумитамы пиосмурт вамышъя. Сюресэз юано кариським. Шонер, пе, мсынӥськоды. Но пичи шур дуре вуыса, сюрес быриз. Берытским. Гуртэ вуыса, адямиослэсь юалом ни шуиськом. Но ульчаын нокин уг адскы. Гурт пуме потыса вуиськом вал ини, капка азяз пукись песятаез адӟим. Со милемлы сюресэз пыр-поч валэктӥз.

Нош ик нюлэс, нош ик изо сюрес. Кема-а, ӧжыт-а мынӥм – ура! Излэсь юрта адскиз. Со вӧзын – кык мемориалъёс. Текеево гурт али картаын ӧвӧл ни. Кызьы вераз музейын ужась, сое Пугачёв бунт дыръя ӝуатӥллям. Юрта вӧзысь одӥгез мемориал Салават Юлаевлы сӥземын, кыкетӥез - ӝуам гуртъёслы. Вераны кулэ, Салават ёросын, Текеево сяна, сизьым гуртъёсты ӝуатыса быдтӥллям на. Дас тямысэтӥ даурысен картаысь ышиллям Исмаил, Юлай, Якуп, Азналино, Бикбулат, Касай но Мрат гуртъёс.

Текеево туж шулдыр интые – кык шуръёслэн огазеяськон вадьсазы - пуксемын вылэм. Котырак – нюлэс. Татын аспӧртэм шыпыт. Кожалод, одӥгез бадӟым пужым сьӧрысен Салават Юлаев милемыз эскерыса улэ…