Удмурт нылпиос "Усточикар" лагерьын шутэтско

Туэ лагерь нырысьсэ Башкортостан Республикалэн тӧроезлэн грантэз чотын радъяське. Татын нылпиос пӧртэм ӧръёсъя быгатонлыксэс волятозы. Куазь пальышась шундыеныз уг шумпотты ке но, лагере лыктэм нылпиос шумпотон мылкыдын тырмемын. Уго соос пӧлысь тросэз «Усточикаре» нырысьсэ гинэ уг вуо. Соин ог-огзэс тодо, пумиськонзэс чидатэк возьмало.

Туннэ, куинетӥ августэ, лагерез усьтонлы сӥзем ужрад ортчиз. Отын нылпиос, вожатойёс но ӧнерчиос быгатонлыкъёссылэсь пичи люкетсэ возьматӥзы. Ужрад быдэсак удмурт кылын ортчиз. Пиналъёслэсь анай кылынызы вераськемзэс, кырӟамзэс кылзыса, сюлэм шумпотонэн тырмиз.

#ГрантыРБ#ФСГОРБ#языкигранты2024