Бурайын художникъёс ужазы

Суредасьёслэн симпозиумзы таяз арын Россиын ялэм Семьялэн арез  но Башкортостанын ялӥськем Тазалыксыя сюбегатэм луонлыкъёсын адямиос сярысь сюлмаськон арулсын ортчиз. Туэ ужрадэ Уфаысь, Москваысь, Санкт-Петербургысь, Казаньысь, Набережные Челныысь, Ишимбайысь тодмо кызь художникъёс но та удысъя дышетскись студентъёс пыриськизы.

Азьвыл аръёсы выллем ик суредасьёсты Ваныш-Алпаутово гурт пумитаз. Симпозиуме лыктэмъёс Танып шур кузя сплаве потазы, инкуазьлэн шулдыр интыосаз, бускель гуртъёсы вуылӥзы. Со сяна, соос пӧртэм калык лулчеберетэн тодматскизы. Удмурт калык фольклорез возьматӥзы Мамады клубысь культорганизатор Л. Атнафикова, Азяк гуртысь библиотекарь А. Минлиева, Алтау гуртысь «Инвожо» калык ансамбле (кивалтӥсез И. Шарафутдинова) пыриськисьёс.

Уфаысь искусствоосъя кун институтын 4-тӥ курсын дышетскись студентъёс Кира Анисимова, Алия Валиева, Валерия Лобова мастер-классъёс ортчытӥзы.  Отчы мыло-кыдо пыриськизы Бурай ёросысь искусствоосъя школаын дышетскисьёс но инвалид нылпиослы чаклам «Солнечный лучик» центрысь пиналъёс. Соослэн ужъёссы «Танып-Су» арт-галереялэсь фондзэ узырмытӥзы.

Фото: Мамадинский сельский клуб Бураевского района