Тыршоме Инкуазь-анаймес утьыны

Солэн чеберлыкез сярысь дугдытэк вераськыны луэ. Тэльын ветлӥськод-а, шур дуртӥ вамышъяськод-а – гадь тырымон чылкыт омырен шокаськод. Нош мар со чагыр адске куакъёс пӧлын? Матэгес мыныса учкиськод но, инкуазьлэн чеберезлы синмаськыса ӝутскем мылкыд соку ик ыше. Отчы кин ке жуг-жаген тырем пакет куштэм.

Адямиос! Секыт шат валаны, инкуазь асьмелэн дормы, сюдӥсь-вордӥсьмы шуыса. Тыршоме Инкуазь-анаймес утьыны. Утялтэм интыын шутэтскыны но, тазалыкез кыдатыны но каньыл луэ.

Башортостанлэн шулдырзэ адӟыны мукет интыосын улӥсьёс но трос вуо. Регионысь кивалтэт шутэтскон интыосты утялтонэз радъянлы бадӟым саклык висъя. Республикаысь правительстволэн премьер-министрез Андрей Назаров вера: «Башкортостанэ лыктӥсь туристъёслэн лыдзы арысь аре йылэ. Кылем арын, кылсярысь, со лыдпус кык миллионлэсь ятыр вал. Асьмелэн валтӥсь ужпуммы – шутэтскисьёс понна ӟеч луонлыкъёс кылдытон. Саклык висъяно жуг-жаг тырон интыос дасянлы».

Республикаысь инкуазь ваньбурен пайдаяськонъя но экология министрлэсь ужзэ быдэсъясьлэн Данил Шарафутдиновлэн кылъёсызъя, та ужпумлы регионын трос саклык висъяське. «Туристъёс вуылон интыосы жуг-жаг тырон контейнеръёслы чаклам 145 площадкаос лэсьтэмын. 378 контейнеръёс пуктэмын, куинь бункер лэсьтэмын».

Фото:Олег Яровиков