Бадӟым Качакын Инмарлы вазиськизы

Вазь ӵукна куазь сыпыр-сыпыр зориз. Пӧсен куасьмем музъем шуныт вуэн небӟиз, вож турын-куар выльдӥськыса сямен йырзэ вылэ ӝутӥз, берло шунды сиосыныз котыр дуннеез нош ик шунтӥз. Бадӟым Качак гуртын улӥсьёс зорлэсь ӧз кышкалэ: ӵукна пыжиськыса, вӧсе мынын дасяськизы.

Та гуртын арлы быдэ июнь толэзе вӧсь ортче. Гурт калыклэсь кеньыр, коньдон бичаса вӧсяськон ӝук позьто. Нош мылкыд карись вӧзаз ыжпи, ӟаӟег сётэ, коньдонэн но юрттэт каре. Туэ Фарида Муллагалиева, Юлия но Александр Зайнакаевъёс, Олеся но Эдуард  Набиуллинъёс нылпиоссылы но асьсэлы тазалык но шудбур курыса ыжпи сётӥзы, нош Таслима но Валерий Ахметгараевъёс  - ӟаӟег.  Елена но Алексей Вагаповъёс, Ирина но Равиль Тимирхановъёс коньдонэн юрттэт каризы.

Котькытын сямен ик, Бадӟым Качак гуртын но вӧсь ортчытон ужлэн  аслаз радлыкез. Кылсярысь, ӝук пӧзьтыны, вӧсез радъяны котькуд ар пӧртэм ульчаосын улӥсьёс кыл куто. Туэ та ужез Пионерская ульчаысь кышномуртъёс но пиосмуртъёс быдэстӥзы. Вуоно арын Молодёжная ульчаын улӥсьёс басьтӥськозы.

Пӧрасьёс котькуд ар вошъясько ке, куриськисьсы одӥг. Трос аръёс ӵож гурт калыклы тазалык но шудбур курыса Инмарлы  Анатолий Насипуллин вазиське. Нош вӧсьлэн радлыкез понна Марина но Анатолий Апкаримовъёс сюлмасько.

Бадӟым Качакын вӧсь праздниклы пӧрме. Инмарлы куриськыса, ӝук сиыса, люкаськем калык шудонъёсы но конкурсъёсы пыриське. Культура удысын ужасьёслэн тыршеменызы, калыклэн мылкыдэз ӝутӥське. Конкурсъёсы пыриськисьёс ваньзы ик кузьымъёсын пусйисько.