Удмурт юртэз вылӥ дунъязы

Кыллем арнялэн шутэтскон нуналъёсаз Калтасы ёросысь гурт хозяйство удысын тыршисьёс  бусы ужъёсты йылаз-пумаз  вуттыса, Гырон быдтон праздникын шутэтскизы. Ёрос Сабантуе Бадӟым Качак гуртысь калык но пыриськиз. Соос праздникын удмурт калыклэсь юртсэ но улэм-вылэмзэ возьматӥзы. Калыкмы котьку но ужась луэменыз висъяськиз. Секыт война аръёсы но удмурт калык скалзэ ӧз быдты. Соин йӧскалык юртъёсты эскерись комиссиялы качакъёс йӧллэсь пӧртэм сиён-юон поттыны быгатэмзэс возьматӥзы. Зэмос кечез кыскыса куноосты шуныт йӧлэн сектазы, ӵӧжыен табань сюдӥзы. Со сяна, комиссие пыриськись  ёросысь депутат удмурт кусоен турнаны быгатэмзэ возьматӥз, нош мукетыз  удмурт кикоен юэз пызьлы пӧрмытӥз. Подвориос пӧлысь конкурсын удмурт юрт кыкетӥ интые потӥз.