Лыдӟисьёс кие кылбуръёсын «Лулгур» книга вуоз

Солэн авторез – асьмелэн улосчимы (вордӥськемын но будэмын Янаул ёросысь Андреевка гуртын), газетмылэн Пермь шаерысь Бадӟым Гондырысь эшез Антонина Исламова. «Ошмес» газетын ужасьёс понна «Лулгур» книга  одӥгез дуноез луэ. Сое дасянэ редакциын ужасьёс но шӧдскымон люкетсэс пыртӥзы угось.

Антонина Исламова кемалась кылбур дуннеын улэ. Озьы ке но со ассэ ноку кылбурчиен уг лыдъя. Со – гуртысь огшоры удмурт нылкышно. Антонина Васильевналэн кылбуръёсыз удмурт кышномуртлэсь вань шуг-секытъёсты вормыны быгатэмзэ возьмато. Солэн тросаз чуръёсаз адямиез, инкуазез, улонэз шӧдонэз возьматэмын. Нош куд-огез кылбурез матысь адямиосызлэсь мӧзмонэн тырмемын. Озьыен, книгаен ваньмыз одӥг нюжае биниськемын: шумпотон, куректон, мӧзмон.

 «Лулгур» - Антонина Исламовалэн кылбуръёсын нырысетӥ книгаез. Лыдӟисьёсыз со узыр пуштросэныз гинэ ӧвӧл, вылбамыныз но бордаз кыскоз. Отын авторлэн гуртоезлэн Вячеслав Минликаевлэн инкуазь суредэз возьматэмын.