Каймашабашысь песяйёс нылпиосыз узыр шыкысэнызы тодматӥзы

Татын Музейлэн нуналэзлы но Семьялэн калыккуспо нуналэзлы сӥзем ужрад ортчиз. Со «Бабушкин сундучок» нимаськиз. Та нуналэ нылпиос песяйёссылэн узыр шыкысэнызы тодматскизы. Отысь дӥськутъёс шоры нылпиос паймыса учкизы. Шыкысын куэм дэремъёс но, туала вакытэ вуремъёсыз но вань. Ваньзы соос яркыт тусэнызы бордазы кыско. Нылпиос песяйёссэс кылзыса тодӥзы, кыӵе дӥськутэн удмуртъёс азьвыл ветлӥллям, маин шудӥллям. Та нуналэ соос ӵошен удмурт калык кюйёсты кырӟазы, шудӥзы. Со сяна, куинетӥ но ньылетӥ классъёсын дышетскисьёс удмурт выжыкылэз возьматӥзы.