Быдӟымналлэн йылолъёсыз утисько

Вашкалаосмы Быдӟымналлэн ӝытаз корказэс утялтыса, мунчоын пыласькыса курегпузъёсты чебермаса кельтӥзы. Праздник нуналэ ӝук пӧзьтӥзы, шаньга но табань пыжизы. Семьяысь тужгес но арлыдоез пыжем-пӧзьтэмен тазалык но шудбур курыса Инмарлы вазиськиз. Собере ваньзы ӵош пуксьыса куриськем ӝукез сиизы. Та нуналэ ужаны яратӥсь калык шутэтскиз. Бадӟымъёс куно пумитазы, куное ветлӥзы. Нош нылпиос ӵошен люкаськыса гуртэтӥ курегпуз бичазы. Берло пиналъёс лымылэсь мозмытскем гуждоръёсын курегпуз питыратыса шудӥзы.

 Туннэ нуналэ но Быдӟымналлэсь  йылолъёссэ калыкмы ӧз вунэты. Тросаз семьяосын Инмарлы вазиськон кылъёс вунэмын ке но, котькуд анай-атай нылпиосызлы шуд но тазалык вераса аспонназ куриське. Озьы ик та нуналэ удмурт калыкмы ӝӧк вылаз одно ик табань но шаньга пуктэ. Нош нылпиос гурт урамъёстӥ чебермам курегпуз бичаны пото.  Кылсярысь, Калтасы ёросысь Бадӟым Качак гуртлэн урамъёсыз ӵукнаысен нылпиосын тырмемын вал. Соослэн серекъяса бызьылэм куараоссы котыр улосэз шулдыртӥзы. Куазь но Быдӟымналэ удалтӥз: вазь ӵукна ик яркыт шунды сиос калыклы капчи мылкыд кузьмазы.