Тыршемлэн емышез узыр луэ

Парсь вордон удысын – 39 ар

- Мон гуртысь школаез 1984-тӥ арын йылпумъяй. Соку вакытэз сыӵе вал – колхозэ ужаны интыяськыны ӵектылӥзы, - вера Динара Галинуровна. – Школаез йылпумъян арын, сӥзьыл, парсь вордон комплексэ ужаны кутски. Со дырысен удысме ӧй вошъя ни.

Куамын укмыс ар ӵоже ни Д. Ахметзянова одӥг сюрестӥз дышем ужаз вамышъя. «Быръем ужед сюлэмедлы матын ке, ужаны шумпотыса мынӥськод. Вормонъёс но витьымтэ шорысь кадь тон доры «кыстӥсько», - шуэ со. – Мон откормочной группаын нырысь ужай, берлось куамын арзэ маточной группаын ужасько, парсьёсты пиятӥсько.

Динара Галинуровналэн уж дураз утэм вормонъёсыз трос. Солэн аръёс ӵоже тыршемез Янаул ёрос администрацилэн Таукаронъёсыныз, Данъян грамотаосыныз дунъямын. Со сяна, Башкортостанысь Гурт хозяйствоя министерстволэн Данъян грамотаосыз но вань. Нош туэ Гурт удысын тыршисьёслэн нуналзылы сӥзем ужрадын республикалэн тӧроез Радий Хабиров Динара Галинуровнаез «БР-ысь гурт удысысь сӥё-дано ужась» нимен пусйиз.

- Таӵе вылӥ награда басьто шуыса уг малпаськы вал, - вера Д. Ахметзянова. – Шумпотӥсько, ужме дунъязы шуыса.

Секытлыкъёсты вормыса

Улон адямилы пӧртэм эскеронъёс вае. Сюрес вылын куддыр пыд йылысь погыртымон шуккетъёс пумисько. Динара Галинуровнаез но улон жалямтэ, вылаз-вылаз секыт кайгу сётэм.

Егит кышномурт Барабановкаысь ик Геннадийлы бызем. Шудо пар луыса, соос 13 ар гинэ улӥллям. «Кузпалылэн сюлмыз висьылӥз. мыным куамын вить арес вал, со улонысь кошкиз. Одӥг гинэ пимы вал. Со но, сюлэм висёнэныз сэрен, 27 аресаз кулӥз», - синвуоссэ ватыны турттыса вера Д. Ахметзянова.  

Динара Галинуровналэн пиезлэн кык ныпиосыз будо. Элеонораен Ярослав шутэтскон нуналъёссэс песяйзы дорын ортчыто.

- Внукъёсы Янаулын уло, шутэтскыкузы гуртэ берто. Соос вӧзам дыръя корка но шулдырске, мӧзмон но тӧлӟе. Оген улыны капчи ӧвӧл угось.

Динара Галинуровна 2020-тӥ арысен огназ. Со дырозь кышномурт кузпалызлэн анаеныз улэм. 

Уж адямиез буйгатэ

Динара Галинуровналэн ужан дырыз ӵукна тямысын кутске. Дораз со ньыль час бере бертэ. Парсь вордон комплексысь жадьыса бертэм кышномуртлы шутэтскон ӝог гинэ уг шедьы. Хозяйствоез луэм адямилэн юртъер котыраз но ужез трос луэ. Ыжъёсты, чипы-курегъёсты сюдоно, утялтоно, тулысысен сӥзьылозь бакчаын но ужано. Но секытлыкъёслы кышномурт уг ӝожтӥськы. Тазалыкез гинэ егит дыръяз кадь юн ӧвӧл ни, пе. «Берло дыре пыдъёсы висьыны кутскизы. Соин пенсие потон сярысь малпаськоно ни», - вера Д. Ахметзянова.