Мошенникъёс нылпиос борды басьтӥськизы

Котькуд нунал сямен капчи уксёен пайдаяськыны яратӥсьёс сярысь верало ке но, мошенникъёслэн куриказы шедисьёслэн лыдзы уг кулэсмы. Нош берло дыре «коньдон лушкасьёс» асьсэлэн сьӧд ужъёсазы нылпиосты но кыскыны кутскизы. Кылсярысь, кема ӧвӧл Калтасы ёросысь Краснохолмскийысь одӥгаз школаын дышетскись нылпилы матысь нефтебазаез пуштытыны курыса SMS-ивор вуэм. Лэсьтэм ужзэ трос коньдонэн пусйыны кыл сётӥллям. Пиналлэн анай-атайез вакытаз телефонысьтыз иворзэ ӧй адӟысалзы ке, нылпи улонзэ пыраклы сӧрысал.

Та выллем югдур кылдэмен, Калтасы ёросысь школаосын анай-атайёсын вераськонъёс радъяськизы. Кылсярысь, Бадӟым Качак дышетскон юртэ Россиысь МВД-лэн Калтасы ёросъя ёзэтэныз кивалтӥсезлэн воштӥсез А.Г. Муниров вуылӥз. Альберт Гафиятович анай-атайёсты нылпиосынызы огкылысь луыны куриз. Угось озьы гинэ соосты мошенникъёслэсь утьыны луоз.