Канлыос но диктант гожтӥзы

Бадӟым удмурт диктант гожтыны мылкыд карисьёс туэ но трос луизы. Акцие пыриськизы Удмуртиысь вань ёросъёсын, Москваын, Татарстанын, Башкортостанын, Пермь но Киров улосвылъёсын улӥсьёс. Ижевскын улӥсьёс понна диктант гожтыны валтӥсь инты Калыкъёслэн эшъяськон юртазы радъямын вал. Нош мукетъёс понна текстэз «Моя Удмуртия» радио пыр, «Удмуртия» телеканалын меӵак эфиръёсын лыдӟизы. Диктантлы текст малпаз «Удмурт дунне» газетлэн валтӥсь редакторез, «Удмурт нылкышно кенеш» огазеяськонлэн кивалтӥсез Елена Миннигараева. Диктант сӥземын вал Семьялэн арезлы.

Кушнаренко ёросысь Канлы гуртын улӥсьёс но удмурт кылын диктант гожтыны мылкыд каризы. Соос гуртысьтызы библиотекае люкаськизы. Текстэз лыдӟиз Ахметово школаысь удмурт кылъя  дышетӥсь Эльза Сайфутдинова. "Диктант гожтыны кызь кузя люкаським", - вера Э. Сайфутдинова.

Фото: соцсети Эльза Сайфутдинова