Нылпи творчествоя фестиваль "Деловой шудонэн" кутскиз

Сое кузёос усьтӥзы. Улысь Балтачысь пиналъёс сцена вылэ чебер калык дӥськутэн но удмурт кырӟанэн потӥзы. Эшъёссы соосты зол кичабонъёсын пумитазы. Асьсэос
но уго фестивале зол дасяськизы: Татышлы ёросысь Выль Татышлыысь, Калмиярысь, Уразгильдыысь, Кызыл-Ярысь, Вязовкаысь, Вылысь Татышлыысь кыкетӥ номеро школаысь, Янаул ёросысь Шудекысь, Каймашабашысь но Вуж Варашысь, Калтасы ёросысь Бадӟым Качакысь нылпиос кырӟаны-эктыны, кылбур вераны, удмурт кылын вераськыны быгатэмзэс
возьматӥзы.

Вераны кулэ, Вылысь Татышлыысь кыкетӥ номеро школаын дышетскись пиналъёс туэ фестивале нырысьсэ пыриськизы. Соос удмурт лулчеберетэз, анай кылзэс сюлмысь гажало. Жаляса верано, нылпиос анай кылзэс уг дышето. Соин соос фестивальын «Деловая игра» конкурсэ ӧз пыриське. Солэн бадӟым люкетэз анай кыллы но литературалы сӥземын валугось. Нош та нуналэ отын сизьым команда шудӥз. Удмурт кылъя но литературая тодонваланзэс возьматӥзы Кальтяевоысь, Шудекысь, Каймашабашысь, Бадӟым Качакысь, Вуж Варашысь, Выль Татышлыысь но солэн Калмиярысь но Уразгильдыысь филиалъёсысьтыз пиналъёслэн огазеям командазы. Со сяна, кузёос но Кызыл-Ярысь пиналъёсын ӵош одӥг команда кылдытӥзы. Шудӥсьёс удмурт писательёслэсь но соослэсь ужъёссэс, лэчыт веранъёсты тодэмзэс но трос мукетсэ возьматӥзы.

Туспуктэмъёсыз Генрих Баймиевлэн.