Удмурт кылъя республика олимпиада ортчиз

 Удмурт кылъя но литературая олимпиадаын Бурай, Кушнаренко, Татышлы, Янаул ёросъёсысь 20 дышетскисьёс тодон-валанзэс возьматӥзы. Жюриен кивалтӥсьлэн, Янаул ёросысь Каймашабаш школаысь дышетӥсьлэн О. Р. Давлетовалэн кылъёсызъя, олимпиада куинь этапен ортчиз. Нылпиос викторина ужазы, ог-огенызы удмурт кылын вераськыны быгатэмзэс возьматӥзы, кылбурез яке прозаез учкытэк чебер веразы. Викторинаын удмурт кылъя но литературая юанъёс луизы. Берпуметӥез асьме республикаысь удмурт литературалы сӥземын вал. Пиналъёс Ада Диевалэн но Люза Бадретдиновалэн кылбуръёсызлы анализ лэсьтӥзы.

 Олимпиадаын дас одӥгетӥ классын дышетскисьёс пӧлын вормисе потӥз Татышлы ёросысь Улысь Балтач школаысь Диана Габокова. Ӟеч тодон-валанэнызы висъяськизы призёръёс: Бурай ёросысь Выль Тазлар школаысь Азалина Галиханова, Янаул ёросысь Ямады школаысь Элина Куштанаева но Выль Артаул школаысь Диана Шараева. Нош 10-тӥ классъёс пӧлын Татышлы ёросысь Кальтяево школаысь Ксения Рахматуллиналы вуисьёс ӧз луэ. Жюри вылӥ дунъяз Улысь Балтач школаысь Михаил Кайрановлэсь, Янаул ёросысь Вуж Варашысь Дарья Галлямшиналэсь но Татьяна Асатовалэсь быгатонзэс. Соос призёр нимез басьтӥзы. Укмысэтӥ классъёс пӧлын вормисен лыдъямын Татышлы ёросысь Выль Татышлы школаысь Анастасия Хатипова. Нош призёръёс пӧлы шедизы Улысь Балтач школаысь Азалия Гарифуллина, Янаул ёросысь Вуж Варашысь Полина Мингараева но Шудекысь Дарья Гарайшина. Соос Данъян грамотаосын пусъемын. Со сяна, олимпиадае пыриськем котькудӥз пинал анай кылзэ утемез понна Башкортостанысь удмуртъёслэн национально-культурной центрзылэн Таукаронэныз но синпель кузьыменыз данъямын. Нош Калмияр школаысь укмысэтӥ классын дышетскись Виктория Мардамшинаез Башкортостанысь Калыкъёслэн эшъяськон юртсылэн Тау карон гожтэтэныз шумпоттӥзы на. Вормисьёсты табере выль эскерон вите – соос матысь дыре удмурт кылъя но литературая регионъёс куспысь олимпиадае пыриськозы. Дышетскисьёс Башкортостанысь удмурт пиналъёслэсь анай кылзэс гажамзэс возьматозы.