Вормон понна ӵошен тыршоно

Нимысьтыз военной операцие пыриськисьёслы котькуд адями быгатэмезъя юрттэт возьматыны тырше. Кылсярысь, гуртъёсын масксетка керттон ӟеч сямлы пӧрмиз ни.

Пермь шаерысь Куеда ёросысь Гожан гуртын улӥсьёс но юрттэт возьматонлэсь палэнэ уг кылё. Нырысь соос лапша дасяса пиослы келязы. Табере ини маскировочной сеть керттон борды басьтӥськизы.

- Тау кылъёсмес вераськом гуртысьтымы хозяйствоен кивалтӥсьлы Л. Ф. Самиевлы, сетез юнматон инты тупатэмез понна. Ми со станокез «Гурт кужым» нимамы. Бадӟым тау ваньзылы, кин масксетка керттыны пыриське, - гожтэ вотэс бамаз Гожанысь клубен кивалтӥсь Людмила Шаяхметова. - Ми тодӥськом, Вормон ми киын луоз!

Куеда ёросын бакча сиёнъёсты но люкало. Кешырез, картофкаез, сугонэз, гордкушманэз, кубистаез куасьто но СВО-е ысто. Вервны кулэ, нимысьтыз военной операцие лэзён понна бакча сиёнъёсты Гожанысь Мичурин нимо ООО-лэн столовояз но сётыны луэ.

Фото: Гожанский сельский клуб