Калмиярын благотворительной концерт ортчиз

19-тӥ толшоре благотворительной концерт Татышлы ёросысь Калмиярын радъяськиз. Культура юртэ зал тыр калык люкаськиз. Учкисьёс пӧлын луизы СВО-ысь отпуске бертэм пиос, нимысьтыз военной операцие пыриськисьёслэн анай-атайёссы, кузпалъёссы, матысьёссы. Та ӝытэ одӥг тугокое биниськизы кырӟан-крезьгуръёс, эктонъёс но кылбур чуръёс. Концерт бадӟымъёсты но, пичиосты но огазеяз. Учкисьёслы шулдыр мылкыд кузьмазы Калмиярысь нылпи садысь, школаысь пиналъёс, культура юртын ужасьёс, «Инвожо», «Соловушки» ансамбльёсы пыриськисьёс. Нимысьтыз военной операцие пыриськисьлэн кузпалыз Юрина Минлиаскарова учкисьёслы аслэсьтыз гожтэм кылбур чуръёссэ кузьмаз. Солэн кылбуръёсыз ож лудын ожмаськисьёслы, шаерез утёнлы, вормонлы сӥзьыса гожтэмын. Со сяна, концертэ вуизы Татышлы ёросысь Улысь Балтачысь «Ӧрӟи», Вязовкаысь «Вуюись», Уразгильдыысь «Дэмен», Выль Татышлыысь Марина Низамова, Юрий Нуриахметов, Валерий Сабанчин, Уразгильыысь Зоя Риянова, Калмиярысь Светлана Мардамшина, Вылысь Татышлыысь нылпиослы искусствоосъя школалэн Выль Татышлыысь филиалаз дышетскисьёс, Бурай ёросысь Алтауысь «Инвожо», Янаул ёросысь Вуж Варашысь «Югдон», Пермь шаерысь Куеда ёросысь Вуж Шагиртысь «Инвожо» ансамбльёс но Калтасы ёросысь Бадӟым Качакысь Тимур но Александр Ильбаевъёс.

Башкортостанысь удмуртъёслэн национально-культурной центренызы кивалтӥсь Людвиг Зидымаков ужрадэз радъяны юрттӥсьёсты, концертэз шулдыртӥсьёсты Тау карон гожтэтъёсын пусйиз, шаермес  утись пиослы тазалык но вормонэн бертон сӥзиз.