Алтау гуртын улӥсьёс куасэн ӵошатскизы

Кузбай гурт поселенилэн администрациеныз кивалтӥсьлэн Ф.Б. Закировлэн но «Трезвое село – Алтаево» оргкомитетлэн кичӧлтэмезъя, Бурай ёросысь Алтау гуртын «Лыжня румяных» куасэн ӵошатскон ортчиз.

Ужрадэ алтауос пыр-поч дасяськизы. Ӵошатсконъёслы волонтёръёс нимысьтыз воргоронъёслы, кышномуртъёслы но нылпиослы трассаос тупатӥзы. Нош гуртлэн старостаез А.Ш. Ялалов аслаз снегоходэныз учкисьёслы сюрес лэсьтӥз.

7-тӥ январе Алтауын улӥсьёс ваньзы сямен ик куас вылэ султӥзы. Угось та нуналэ соосты ӟырдыт нунал возьмаз. Гурт поселенилэн администрациеныз кивалтӥсь Ф.Б. Закиров но калыкен ӵош куасэн бызьылӥз. Нош судьялэсь ужзэ ӵошатсконъёсын М.Г. Гафутдинова быдэсъяз. Марина Геннадиевна угось куасэн бызьылон удысэз умой вала. Трос аръёс ӵоже со ёрос ӵошатсконъёсын нырысетӥ инты басьтылӥз.

Спорт ужрадлэн йылпумъянъёсызъя, кышномуртъёс пӧлын нырысетӥ интыез Зинаида Вагапова утӥз, Зилина Мухаметханова кыкетӥ интылы кузё луиз, нош Дуся Ялалова куинетӥ интые потӥз. Воргоронъёс пӧлын тужгес но Руслан Ханафинлы удалӥз, солэсь ӧжытлы бере кылиз Валерий Габидуллин, нош Гаврил Минниахметов куинетӥ инты басьтӥз. Вормисьёсты данъян грамотаосын но кузьымъёсын пусйизы.

Фото: Марина Гафутдинова