Мамадыос мастер-классэ пыриськизы

Куиськон амалъёсты удмурт калык вашкала дырысен ик ужаз кутӥз. Озьы соос асьсэлы дӥськут но пӧрмытъязы, корка пушсэс но чеберъязы. Туала арын магазинъёсын пӧртэм чебер арбериос трос луэмен, егитъёс куиськон ужез вунэтыса мыно. Вашкала куиськон макеос но музейосын гинэ вань на, дыр, яке куд-ог песянайёслэн корка чигъёсазы тузон пӧлын уло.

Мамады гуртысь культорганизатор Л.В. Атнафикова люкаськем калыклы ковёр куонъя мастер класс возьматӥз. Нырысь ик со куиськон ужлэсь котькуд люкетъёссэ валэктӥз: кызьы схема суредано, кызьы ужан тӥрлыкез дасяно. Берло ужрадэ пыриськисьёс, куиськон ужлэсь шӧмзэ шӧдон вылысь, асьсэос станокен ужазы.

Фото: Мамадинский СК