Удмурт кыллы сӥзем конкурсэ пыриськизы

2001-тӥ арын 27-тӥ ноябре «Удмурт Элькунысь кун кылъёс но Удмурт Элькунын улӥсь мукет калыкъёслэн кылъёссы сярысь» закон кутэмын вал. Соя удмурт кыл Удмуртиын кун кыл статус басьтӥз. Со дырысен 27-тӥ ноябре быдэс дуннеын Удмурт кыллэсь нуналзэ пусъё.

Та нуналэ Бадӟым Качак гуртысь «Зангари» калык ансамбль, анай  кылэз данъяса, нимысьтыз ужрад ортчытӥз. Библиотекарь Л.И. Насипуллина ужрадэ пыриськисьёслы тунсыко конкурс дасяз. Кырӟаны-эктыны яратӥсь кышномуртъёс «Ошмес» но «Вуюись»  командаослы люкиськизы. Соослэсь удмурт кылэз но шаерез, гожъясьёсты но сям-йылолъёсты тодэм-валамзэс эскеризы. Командаос понна гордэктоно ӧз луы: котькуд юанлы соос туж ӝог валэктон шедьтылӥзы.  Ужрад удмурт кырӟанъёсын йылпумъяськиз. Нош берло удмурт кышномуртъёс удмурт калык сиён-юонъёсын чай юизы.