1961-тӥ арын 12-тӥ оштолэзе Юрий Гагарин космосэ лобӟиз. Ӵуказеяз Ижевскысь 62-тӥ номеро школа нырысетӥ космонавтлэсь нимзэ нуллыны кутскем: татын ракетаос лэсьтылонъя кружок ужа вылэм. Кружокез физикая дышетӥсь нуэм. Нылпиос асьсэ киосынызы ракетаослэсь макетъёссэс лэсьтылӥллям. Соослэсь ужъёссэс ВДНХ-ын но возьматъяллям. 1965-тӥ арысен школаын космонавтикалы сӥзем музей ужа. Со Удмуртиын одӥг гинэ. Пусъёно, авиацилы но космонавтикалы сӥзем музеёс Россиын 20-лы матэ лыдъясько.
Школаысь музее экспонатъёс люкан сярысь сюлмаськиллям дышетӥсьёс, нылпиос, анай-атайёс. Палэнысь адямиос но юрттӥллям. Ракетаослэсь макетъёссэс Дебёс школа но кузьмам. Отын куке но ракетаос лэсьтонъя кружок ужа вылэм, но берло ворсаськем. Нош экспонатъёссы возиськиллям.
Музейлэн люкетъёсаз вуыса, витринаосысь арбериосты учкыса-эскерыса, авиацилэн но космонавтикалэн азинскем сюресэныз быдэсак тодматскыны луэ. Татчы лыктӥсьёслы дышетскисьёс ик тунсыко экскурсиос радъяло.
1996-тӥ арысен та школаысь 1-тӥ классын дышетскисьёсты пичи гагаринецъёслэн радазы пырто. Вераны кулэ, школаез йылпумъям пиналъёс тросэз азьпал улонзэс авиациен герӟало.
Фото: О. Русских.