Балтач ёросысь Асавка гуртын вордӥськем но будэм Совето Союзысь Геройлы Ульмас Шакировлы сӥзем ужрадэз школаын дышетскись нылпиос усьтӥзы. Соос Героез данъяса кылбур чуръёс веразы. Ужрадэ пыриськисьёс Ульмас Шакировичлэн бюстэз азе сяськаос, венокъёс понэмзы бере, музей-библиотекае кожизы. Отын соос Геройлэн дӥськутъёсыныз, туспуктэмъёсыныз, арбериосыныз, ожысь гожтэтъёсыныз, наградной удостоверениосыныз, орденъёсыныз но медальёсыныз тодматскизы. Бӧрысь ужрад гуртысь клубын азинскиз. Татын Совето Союзысь Геройлэн Ульмас Шакировлэн быдэс улон сюресэз син азетӥ ортчиз кадь. Ужрадэ пыриськисьёс солэсь геройлыко, калыкез понна сюлмаськись луэмзэ пусйизы. Башкортостанысь удмуртъёслэн НКЦ-зылэн кивалтӥсезлэн воштӥсез, Татышлы ёросысь Улысь Балтач гурт поселенилэн администрациеныз кивалтӥсь Эдуард Рахимзянов удмурт Героен данъяськемзэ вераз. «Геройёс улэп соку, куке соосты буре ваё, соослы сӥзем ужрадъёс ортчыто. Таӵе бадӟым адямилэсь данзэ утёно, со котьку калык пӧлын мед улоз», – вераз со.
Ужрадэз кырӟанъёсын Асавкаысь Лидия Пукрокова, Альфия Ахмадуллина, Лида Низамова, Татышлы ёросысь Улысь Балтачысь «Русский сувенир» но «Рябинушка» ансамбльёсын кивалтӥсь Ирина Шайхлисламова, Тошкур но Вуж Балтач культура юртъёсын ужасьёс шулдыртӥзы. Нош Тошкурысь Гульшат Ихсанова Ульмас Шакировлы сӥзьыса гожтэм кылбурзэ лыдӟиз.