Киргаын Элен вӧсь но фестиваль ортчозы

Со дырысен со арлы быдэ радъяське. Элен вӧсь куинь гуртъёсын ортче: Алтауын, Янаул ёросысь Вуж Варашын, Пермь шаерысь Куеда ёросысь Киргаын. Со котькуд ар инвожо толэзь пумын радъяське. Отын  тупаса, ӟеч улон, тазалык понна, емышъёсмы, бакча сиёнъёсмы, ю-няньмы мед удалтоз шуыса курисько.

Туэ Инмар-Кылчинлы Киргаын 26-тӥ инвожое вазиськозы. Мылкыд карисьёсты вӧсе 13.00 часэ ӧтё.  «Элен вӧсе арлы быдэ трос калык люкаське, - вера Ижевскысь Камсьӧр удмуртъёслэн огазеяськонэнызы кивалтӥсь, вӧсез радъясь Флюра Ахметовна Чибышева. – Туэ Элен вӧсьлэн котырес лыдпусэз. Соин йылолэз паськытгес ортчытыны малпамын. Инмарлы вазиськеммы бере, вӧсь лудлэсь палэнын Элен фестиваль кутскоз».

Фестивале Пермь шаерысь, Башкортостанысь, Удмуртиысь ансамбльёс пыриськозы.