Ульфат Бадретдиновлэн "Туннэ - ӵуказелэн кутсконэз" романэз книгаен потӥз

Та вакытэ тросэз лыдӟисьёсмы юазы, роман ку книгаен потоз ни шуыса. Туннэ тӥледыз шумпоттыны дыртӥськом: писательлэн выль книгаез дуннеез адӟиз! Со пумысен автор вотэс бамаз гожтэ: "Одӥг арлэсь кемагес сое гожтыны выри. Тани со нимаз книгаен вордӥськиз. Мон "Туннэ - ӵуказелэн кутсконэз" романэ сярысь верасько.
Максим Прокопьев но Светлана Куноева - удмурт кылбурчиос. Пӧртэм вакытэ соос улэмын но уло. Нырысетӥез дышетӥсь, комиссар, калыкез югдытӥсь, удмуртъёслы кунлык кылдытыны сюлмаськись адями вал, нимыз тросэзлы тодмо луиз. Кыкетӥез туала вакытэ улэ, солэн нимыз уноезлы тодмо ӧвӧл, озьы ке но дунне шоры учконэз, калыкмы сярысь сюлмаськемез, яратонзэ шедьтэмез, шуг-секытъёсты ортчемез, кылбурет дуннеын поръямез, ӟечезлы осконэз Максим Прокопьевлэн выллемгес ик. Малы? Кызьы соос калыкез югдытон, дышетон, солэсь ӵуказе нуналлы осконзэ юнматон ужез вормыны быгатӥзы? Ваньзэ тае тододы, романэз пумозяз лыдӟыса.
Та книгаез поттыны коньдонэн юрттэмзы понна тау карисько: Вавож ёросысь "Колхоз Колос" СХПХ-лы (кивалтӥсез В.А.Красильников), "Татарстан Элькунысь удмуртъёслэн национально-культурной автономизы" мерлыко огазеяськонлы (кивалтӥсез А.С.Герасимов, Татарстанысь Кукмор ёросысь "Агрофирма Рассвет" СХПК-лы (кивалтӥсьёсыз Г.Х. Хабибрахманов, Л.М.Михайлов), Башкортостанын улӥсь Фариса но Зилина сузэръёсылы.

Книгаез басьтыны но лыдӟыны мылкыд карисьёс мыным яке "Кизили" журналлэн редакцияз (83412-78-08-70 телефонъя Люза Геннадиевналы) вазиськыны быгатозы. Тиражез бадӟым ӧвӧл."