"Шудо табань" праздникысь кык полэс вормонэн бертӥзы

Отчы ёросысьтызы делегациос но пӧртэм регионъёсысь коллективъёс вуизы. Соос пӧлын луиз Башкортостанысь Татышлы ёросысь Улысь  Балтачысь "Рябинушка" ансамбль но. Республикаысьтымы удмурт коллектив "Кырӟаськом анай кылын" конкурсэ пыриськиз. Татын соослэсь быгатонлыксэс "Коллективы художественного самодеятельного творчества" номинациын нырысетӥ степенё дипломен пусйизы. Нош ансамблен кивалтӥсез Ирина Шайхлисламоваез "Солисты" номинациын кыкетӥ степенё дипломен данъязы на. 

"Праздник трос выльзэ сётӥз, - вера Башкортостанысь удмуртъёслэн нацинально-культурной центренызы кивалтӥсь Л. Л. Зидымаков. - Татын одӥг нуналэ трос пӧртэм конкурсъёс радъяськизы. Соос пӧлысь котькудӥз удмурт кылэз утён, культураез азинтон но калыкъёслэсь эшъяськонзэс юнматон понна радъямын вал".