Кивалтон биньгозыез юн кырмоно

Син азяз гурт пумысьтызы ӝужыт бадяр йӧтӥз. Педор тодэ на песятаезлэсь со писпу сярысь верамзэ. Ӝужыт бадяр гуртысьтызы вань пиосмуртъёсты оже келям, улэп бертэмъёссэ – пумитам.Гурт калыкез берпуметӥ сюресазы но со трос келлям. Нош табере ачиз но пересьмемын ни.

«Губыртӥськем ни, ӝоген погралоз, - малпаз Педор укно синъёс пыр ульчае учкыса. – Вандоно, лек сӥльтӧл ӝутскиз ке, адями вылэ но пограны быгатоз ук. Яке тӥни воксё корка вылэ усёз». Педор ӝӧк вылысьтыз телефон борды кыстӥськиз. Со, атаслэсь чоръямзэ витьыса улыны ӧз чида ни, гуртооссэ сайкатыны малпаз. «Адямиос султӥзы ке, кытчы ке кошкыны малпалозы, ужмы нош ик кылёз, - малпаз со аспонназ. – Нош синзэс кормыштэмзы бере ик  гожтэмме лыдӟыса, уж сярысь малпаськыны кутскозы». Зэм, гожтэм чуръёссэ кин ке ӵукна вить часын учкиз меда? Гуртын уж валесысь вырӟем бере ик кутске угось: скал кысконо, сое кыре келяно, курегъёстэ утялтоно, бакчадэ но котыртыны вутсконо.

...Педорлэсь гожтэмзэ кӧня ке адями ӵукна адӟыса вуттэм. Туала вакытэ гуртын но ваньзы пудо уг вордо ни вылэм. Соин валесысь султэмзылэсь азьвыл ик телефон борды кырмиськыса вань выль иворъёсты учкыны вутско.Нош Педор табере выль нунал сярысь малпаське ни. Диваназ пуксьыса со йыртышсэ корма: «Маин бен гуртоосме сюлмаськытоно? Кыӵе уж соос понна малпано?»

Воргорон гуртазы быдэстэм ужъёс понна пумтэм шумпотэ. Тӥни ук ульчаоссы но берлось нуналъёс куспын макем чебер луизы. Ваньмыз солэн - кивалтӥсьлэн – тыршеменыз. Таӵе воштӥськонъёс понна зэмзэ ик туж шумпотоно. Но… озьы ке но куддыр калыклэн мылкыдыз сярысь малпаськоно, вылды. Кивалтӥсьлы биньгозызэ сырк возёно ӧвӧл ке но, улонын ваньмызлэн аслаз эсэпез луыны кулэ. Сотэк ымныр тусбуйдэ но ыштыны кема ӧвӧл.

Туспуктэм интернетысь басьтэмын.