Бадӟым сюлэмо адями

Книга Башкортостанысь но, солэн палэнысьтыз но трос адямиослэн сюлэмазы сюрес шедьтоз. Отын Ренат Биктимировичлэн быдэс улон сюресэз яркыт возьматэмын. Нош со сьӧры республикамылэн, отын улӥсь удмурт калыклэн пӧртэм аръёсы азинскемзы ватскемын. Но, жаляса верано, Р. Б. Галямшин сое лыдӟыса ӧз вутты: книгаез поттыны дасякузы сюлэмыз жугемысь дугдӥз. «Книгалэн пуштросэз бордын ӵошен ужамы, - вера пиез Рустам Галямшин. – Атай туспуктэмъёсты но ачиз бырйиз». Книгае трос туспуктэмъёс пыртэмын. Соос пыр шӧдӥськод, кӧня уж быдэстэм Ренат Биктимирович гурт удысэз азинтон, удмуртлыкез утён понна. Одӥгаз туспуктэмын, кылсярысь, со Уразгильдыысь фермаысь ужасьёсын ӵош возьматэмын, мукетаз – Ижевскысь медициная кун академилэн азьвыл ректореныз Н. С. Стрелковен, куинетӥяз – оскымон эшеныз, юрттӥсеныз Ю. С. Саитовен. Яркыт туспуктэмъёс Ренат Биктимировичлэсь улонзэ котыр ласянь усьто.

Книгаез Р. Б. Галямшинлэн анай-атаезлы, семьяезлы сӥзем очерк усьтэ. «Агае паймымон адями вал. Со пичиысен ик «Урал» колхозын ужаз. Тодӥсько на, кызьы со туж шумпотӥз, куке солы колхозлэсь валзэ оскизы», - вера солэн Владимир выныз. Зэмзэ но, Ренат Биктимирович валъёсты юн яратӥз. Хозяйствоысьтыз валъёсыз сабантуйёсын ӵемысь вормисьёс пӧлын луылӥзы. Нош собере Р. Б. Галямшинлэн гурт удысэз азинтэмез, удмурт калык сярысь сюлмаськемез сярысь лыдӟыны луэ. Нимысьтыз очеркъёс дасямын Ренат Биктимировичлэн Рустам пиез сярысь. Со - ветеринарияя наукаосъя кандидат, естествознанияя Российской академилэн профессорез. Книгаын бадӟым инты висъямын Ренат Биктимировичлэн яратоно Лиана но Регина нылъёсызлы.

Ренат Биктимовичез туннэ тросэз тодмоосыз шуныт кылъёсын тодазы ваё. Соослэн малпанъёссы книгае но пыртэмын. Кузпалыз Расима Муллакаевна вера: «Кузпалы котьку семьяез сярысь сюлмаськиз. Нылпиосмы азе но со юн куронъёс пуктӥз.Соин ик пиналъёсмы асьсэлы ӟеч сюрес бырйыны быгатӥзы». Книга Татышлы ёрос администрациен азьвыл аръёсы кивалтӥсь Ф. Т. Гайнаншинлэн, Янаул ёросысь удмуртъёслэн огазеяськонэнызы кивалтӥсьлэн Ю. С. Саитовлэн, Камсьӧр удмуртъёслэн огазеяськонэнызы кивалтӥсьлэн Ф. А. Чибышевалэн, «Удмурт Кенеш» огазеяськонлэн президентэзлэн Т. В. Ишматовалэн но мукетъёслэн малпанъёсынызы тодматэ.

Книгалэн тиражез бадӟым ӧвӧл, со 100 экземплярен поттэмын. Озьы ке но гурт улонэз но ужез гажаны дышетӥсь, семьяен, удмурт кылэн, культураен данъяськон мылкыд пыӵатӥсь книгаен тодматскыны асьмелы котькудмылы луонлык мед кылдысал.