Тугаськем малпанъёс

Удалтӥзы туэ бакча сиёнъёс но емышъёс. Маша кенаклэн сомында улмоосты быдэс улоназ но, оло, адӟемез ӧй вал на, дыр. Нош ӵуказе солы 88 арес тырмоз ни. Со сярысь малпаса песяйлэн бам кузяз синкылиосыз васькизы. Кисьмам улмоосызлэн пудзы но кузёеныз ӵош пересьме ни кадь. Озьы ке но арлы быдэ емышъёсыныз шумпоттэ на. Маша кенак но, со выллем ик, пересьмонлы сётскыны уг тыршы. Со чукналы быдэ, валесысьтыз султыкуз, Инмар-кылчинлэсь бадӟым тазалык куре. Куать арес нуноксэ будэтыны солы трос кужым кулэ на. Пичи Василэн атаез огназ ваньзэ уз вормы.

- Песяй, мынам но улмо сиеме потэ, - кыдёкысен кесяськыса Маша кенак доры нунокез бызе.

Васи вуоно арын школае мыноз. Мукет пиналъёсты отчы анайёссы келялозы, нош Маша кенаклэн нунокез песяеныз вамыштоз. Анаез сое пичи дырысеныз мултэс кариз. «Егит дырлэн янгышез», - шуиз со пизэ.Таӵе кылъёсын Валя бускель гуртазы кошкиз. Отысь воргоронэн выль семья кылдытӥз. Васизылы ньыль арес тырмем бере, со янгышсэ валаса сямен, пиез доры вуылӥз на. Сьӧраз кӧня ке кампет-печення кутэм. «Анай, бадӟым машина ӧд басьты-а?» - юаз соку Васи анаезлэсь. Валя ӧз вазьы, пизэ кылымтэ улэ аналскиз. Со ӝытэ ик Маша кенак, ёрос центразы вуылыса, КамАЗ басьтӥз. «Анаед вордӥськем нуналад кузьманы куриз», - пӧяз со нуноксэ. Со дырысен Валя чиптэм-чаптэм ышиз. Арлэсь кема ни со пиез доры ӧз вуылы. «Атай,ойдо анай доры», - ӵемысь куриськылӥз Васи анаез доры. Озьы ке но атаез солэсь куронзэ быдэстыны ӧз дӥсьты. «Егит дырлэн янгышез…» Валялэн кылъёсыз солэсь йырзэ чидантэм портӥзы. Миша кузпалыныз люкиськем бере тодмантэм воштӥськиз. Берло аръёсы нокин солэсь серемпыр ымнырзэ ӧз адӟылы ни кадь. Пиез но вунэтӥз ни, дыр, атаезлэсь гор-гор серекъямзэ. Пичи дыръяз соос ӵемысь ӵошен кыре потталязы. Васи тодэ на, кызьы одӥг пол со анаеныз нюлэскысь ӵужо-гордо куаръёсты бичаз. «Та куар кадь ик мынам но улонэ куасьме», - вераз соку пичи пилы анаез. Зэм, Васи ӧз вала солэсь кылъёссэ. «Улон ноку уг куасьмы, куаръёс но сяськаос гинэ шуяло», - вазиз со анаезлэн пумитаз.

Валя, семьяез вӧзысь кошкыса, аслэсьтыз трослы бадӟымгес пиосмуртэн улонзэ герӟаз. Виталий пиналысен курыт юонэн эшъяськем. Нош одӥг пол, гуртысьтызы воргоронъёсын шулдыръяськемзы бере, со юыса машинаезлэн руль сьӧраз пуксем. Шӧдыса ик вуттымтэ, сюрес вайвожетӥ потӥсь секытэн нылкышно шоры мертчиськем. Куинь нылпиослэн анайзылэн улонэз интыяз ик чигем. «Трос вирез кошкем», - веразы эмчиос берло. Нош Виталиез пытсэт сьӧры келязы. Кечато-вамено укноос сьӧрын со трос дырзэ ӧз ортчыты ке но, улонэз чуштрак воштӥськиз. Пытсэт сьӧрысь со урмем кион кадь вуиз. Виталий азьвыл эшъёссэ но ӧз тодма ни. «Малпанъёсмы пӧртэмесь», - валэктӥз со анаезлы. Виталийлэн трос дырыз кафеосын но пӧртэм шулдыръяськон интыосын ортчылӥз. Валяен но соос кафеын пумиськизы. Курыт юон пиосмуртэн нылкышноез ӝог эшъяськытӥз. Соос кӧня ке нунал пумиськемзы бере ик улон сюрессэс герӟан сярысь малпаськыны кутскизы. «Азьвыл улонэдлэн пытьыосыз мыным кулэ ӧвӧл», - чурыт курон пуктӥз вуоно кузпалыз азе Виталий. Валя соглаш кариськиз. Но егитъёслэн шулдыр улонзы кема ӧз кыстӥськы. Ӝоген Валя юн сӧсырмыса эмъюртэ шедиз. Эмчиослы со шонерзэ вераны ӧз дӥсьты, йӧвалеге уси шуыса пӧяськиз. «Виталий жугиз шуи ке, берло со монэ юнгес тышкалоз», - малпаз Валя ас понназ. Кузпалъёслэн та выллем пураськонъёссылы нокин ӧз паймы. «Улонзэ тюрьмаысь бертэм пиосмуртэн медаз герӟа вал улонзэ», - малпаллязы куд-огез. Нош кинъёс ке Виталиез жалязы. Одӥгаз нуналэ Виталий уж дурысьтыз нош ик юыса вуиз. «Пиосмурт понна вордэм нылпидэ но мултэс карид», - тышкаськыны кутскиз кузпалзэ. Валя солэн пумитаз номыр вераны ӧз быгаты ни. Виталиезлэн кылъёсыз кышномуртэз сазёмытӥзы кадь. «Ӵуказе пие школае вамыштоз. Песяез солы бадӟым сяська керттэт дасялоз. Нош анайзэ ке юазы, мар со шуоз?» - Валя валаса ик ӧз вутты бам кузяз васькись синкылиоссэ ӵушемзэ. «Мон – анай, мыным пиналы вӧзын луоно», - Валя дӥськутъёссэ дасян борды басьтӥськиз. Со куспын палэнысен кузпалызлэн куараез кылӥськиз: «Возьыттэм тылобурдо! Кикы!» Валя бызьыса ульчае кошкиз. Сӥзьыл тӧл вешаса кадь солэсь йырсиоссэ тугалляз. Егит ныл шӧдытэк ик кылиз кадь малпанъёсыныз пиез вӧзы вуэмзэ. Тани со магазинын Васиезлы дӥськут быръе, ӝытазе небыт, шуныт валесазы ӵошен выдо…

…Васи песяеныз школае вамыштӥз. Со дышетскон юртазы вуытозязы эшъёсыз шоры синмаськыса учкиз. Соос анай-атаенызы вамышто. Нош Василэн атаез толэзен палэнын ужа, анаез кытын ке палэнын. «Мынам но анае вӧзын мед луысал,- ӧз шӧды со малпанзэ шарае поттэмзэ. – Мон сое туж юн яратысал».

Туспуктэм интернетысь басьтэмын.