Данъяськом удмурт калык дӥськутмес

Башкортостанын трос пӧртэм калыкъёс эшъяськыса уло. Соос кылзэс, дӥськутсэс, сям-йылолъёссэс утё но азинто. Республикаысьтымы башкир нылпиослы потӥсь «Акбузат» журналлэн валтӥсь редакторез Лариса Абдуллина «Территория трезвости» форумын удмурт пиналъёс шоры паймыса учкиз. Уго бадӟым ужрадэ соос удмурт калык дӥськутъёсын вуэмын вал. Россиысь устолыкъя но калыкъёслэн чеберлыко кылёсбурзыя арын, БР-ысь Калык дӥськутъёслэн нуналзы бере со туж чебер но мусо адӟиськиз.

Муресазь, айшон, сюлык…

Ермекей ёросысь Купченеевоысь удмуртъёслы но калык дӥськутсы туж дуно. Кема ӧвӧл татысь покчи классъёсын дышетскисьёсты но анайёссылэн, песяй-ӵужайёссылэн дӥськутъёсынызы тодматӥзы. Интыысь удмуртъёслэн огазеяськонэнызы кивалтӥсь А. Н. Вождаева соослы калык дӥськут сярысь мадиз. Нош удмурт кылъя дышетӥсь солэн люкетъёсыныз тодматӥз, муресазь, айшон, сюлык но мукетыз сярысь вераз. Гуртысь библиотекарен Н. В. Пургинаен дасям «Удмуртский национальный костюм – наследие народа» адӟытон но мур пуштросэныз паймытӥз.

«Зангари» калык ансамбле ветлӥсь нылкышноос, пумиськонэз йылпумъяса,  нылпиосты «Ӵӧжи сиён» йылолэн тодматӥзы.

Башкортостанысь удмуртъёслэн НКЦ-зылэн Ермекей ёросысь филиалэныз кивалтӥсь Анастасия Вождаева: "Пумиськонмы пайдаё луиз. Пиналъёсмы та нуналэ удмуртъёс сярысь трос выльзэ тодӥзы. Та выллем ужрадъёс гуртамы азьланяз но трос луозы".  

Нылпиос музеен тодматскизы

Нефтекамскысь историяя но шаертодонъя музейын республикаысьтымы калыкъёслы сӥзем ужрадъёс ӵемысь ортчыло. Алигес отысь «Этнография народов РБ» эскспозиционной залын флешмоб ортчиз. Отчы городысь 25-тӥ номер «Золотой петушок» нылпи садысь пиналъёс но пыриськизы. Соосты башкиръёслэн, бигеръёслэн, ӟучъёслэн, поръёслэн, удмуртъёслэн культураенызы, йылолъёсынызы тодматӥзы.

 «Пиналъёсмы музее асьсэ калык дӥськутъёсынызы мынӥзы, - вера воспитатель Екатерина Насибуллина. – Туэ ми быдэс Россиын радъяськись «Зелёная планета» конкурслэн регионын ортчись этапаз «Современность и традиция» этапаз пыриським. Соин берло вакытэ нылпиосмылэн калык костюмъёсын, сям-йылолъёсын тодматскыны мылкыдзы  ӝутскемын». 

Воспитательлэн кылъёсызъя, нылпиослэн таӵе тунсыкъяськонъёссы семьязы бордысен но потэ. Соос котькуд ужрад борды анай-атайёсынызы  ӵош кутско но вормисьёс пӧлын луо.

Туспуктэм башкир удмурт нылъёсын тодматэ

Интернет вотэсысь «Ми  - удмуртъёс» огин «Мынам удмурт дэреме» онлайн-конкурс ялӥз. Отчы шаермылэн пӧртэм сэрегъёсысьтыз туспуктэмъёс вуо. Соос пӧлысь одӥгаз – Татышлы ёросысь Улысь Балтачысь Карина но Каролина Суфияноваос. Мусо кыкто нылъёс Башкортостанысь удмурт нылкышноослэсь дӥськутъёссэс возьмато. Трос лыдӟисьёс соослы синмаськемзэс гожто ни. Нош нылъёс асьсэ сярысь иворто:

 «Яратӥськом керттӥськыны, сяська будэтыны, суредаськыны, трос дыръя анайлы юрттӥськыны но вуиськом».

Онлайн-конкурсын  Карина но Каролина Суфияноваос понна тӥ но, лыдӟисьёсмы, куарадэс сётыны быгатоды.