Сазь улон – со сайкыт малпанъёс, шудо семьяос, шудбуро пиналъёс, ӟеч ужъёс но выль вормонъёс

Форуме Уфаысь, Ижевскысь, республикамылэн но Удмуртилэн пӧртэм ёросъёсысьтыз куноос вуизы. Улысь балтачъёс куноосты вӧйен-нянен, калык сиён-юонъёсын, кырӟан-крезьгуръёсын пумитазы. Ужрадэ лыктэмъёс культура юртлэн фойеяз кибашлыослэн ужъёсынызы тодматскыны быгатӥзы. Со сяна, удмурт дэрем вуронъя, куиськонъя но ыжгон черсонъя мастер-классъёс радъяськизы.

Форумез усьтыса вераськиз Татышлы ёрос администрациен кивалтӥсь Фанур Шайхисламов. Озьы ик ужрадэ пыриськисьёслы ӟеч сӥзенъёссэс веразы Башкортостанысь дышетонъя министрлэн воштӥсез Альфия Галиева, Удмуртиысь йӧскалык политикая министр Эдуард Петров, Башкортостанысь финн-угор калыкъёслэн ассамблеяенызы кивалтӥсь Виталий Ялаев, башкиръёслэн Быдэсдунне курултайзылэн исполкоменыз кивалтӥсь Юлдаш Юсупов, башкир кылын потӥсь «Акбузат» нылпи журналлэн валтӥсь редакторез Лариса Абдуллина, Удмуртиысь «Удмурт дунне» газетлэн валтӥсь редакторез Елена Миннигараева.

Форумлэн ужез пӧртэм ӧръёсъя азинскиз: тазалыклы сӥзем секция – «На пути к ZОЖ», спортлы сӥзем секция – «В движении - жизнь», дышетонлы сӥзем секция – «Сохранение и развитие языка в семье как способ сохранения культурного кода народа», СМИ-ослы сӥзем секция – «Формирование культуры межэтнического и межнационального общения». Со сяна, юридической но социальной юрттэт возьматонъя секциос ужазы. Отын Россиысь юристъёслэн ассоциацизылэн Татышлы ёросын кивалтӥсез Айрат Садыков но «Семья» центрысь, калыкез ужен тырмытонъя центрысь ӧнерчиос вазиськисьёслэн юанъёссылы валэктонъёс сётъязы. Нош фольклорлы сӥзем ӧрын «Дуно марӟанъёс» фестиваль радъяськиз.

(Пыр-почгес лыдӟе газетмылэн вуоно номерысьтыз).