Татышлы ёросысь тямыс аресъем ныл юрттэтлы кулэяське

Ксениялы туэ укмыс арес тырмоз. «Нылы туж яратэ чылкыт омырен шоканы. Ульчаын со юртъёсты, машинаосты эскере-лыдъя…» - вера Ксениялэн анаез. Зэм, Ксюша, висёнэныз сэрен, мукет пиналъёс сямен ульчаын шудыны уг быгаты. Солы нимысьтыз коляска кулэ. Ксениялэн ДЦП но Айкарди-Гутиереслэн синдромез – туж шер пумиськись генетической висён. «Толалтэ ульчае салазкиен потамы. Нош лымы шуназ ке, коляска кулэ луоз», - азинтэ со веранзэ.

Ксения чиньыосыныз суредаськыны, пазлъёс люканы, урокъёссэ лэсьтыны яратэ (онлайн амалэн дышетске). Нош али со асьмелэн юрттэтмылы кулэяське. Солы коляска басьтыны юрттон понна хоспислэн сайтэз пыр коньдон выжтоно.