Рами Гариповлэн «Туган тел» кылбурез пӧртэм кылъёсын чузъяськоз

Таӵе аспӧртэм проект дася БСТ телеканал. Со Башкортостанысь калык кылбурчилэн 90 аресэзлы но Анай кылъёслэн калыккуспо нуналзылы сӥземын.

- Матысь дыре тӥ кылоды, кызьы чузъяське Рами Гариповлэн «Туган тел» кылбурез пӧртэм кылъёсын. Видеороликъёс кылбурен тодматэм сяна, пӧртэм калыкъёслэсь дӥськутъёссэс но возьматозы. Милям проектмы  калыкъёсты эшъяськытэ, - вера проектлэн продюсерез Наиль Юнусов.

Рами Гариповлэсь кылбурзэ удмурт кылын лыдӟиз Татышлы ёросысь Калмиярысь Ольга Ахметзянова.  Кылбурез удмурт кылэ берыктӥз удмуртъёслэн историяя но культурая центрысьтызы валтӥсь ӧнерчи Ирина Самигулова.