-2 °С
Салкым
Антитеррор
Вань иворъёс
Общество
19 январь 2022, 12:10

Адямиослэн вазиськонъёссы эскериськытэк уг кылё

Дас кыкетӥ толшоре прокуратуралэн кылдэмезлы 300 ар тырмиз. Та удысын быдэстӥськись ужпумъёс сярысь пыр-почгес тодон вылысь, Татышлы ёросысь прокурорлы Фидан Янгуразовлы вазиським.

Адямиослэн вазиськонъёссы эскериськытэк уг кылё
Адямиослэн вазиськонъёссы эскериськытэк уг кылё

- Прокуратуралэн одӥгез ужан ӧрез – со адямиослы юрттон. Кылем арын быдэстэм ужъёсты сярысь вакчияк вералэ вал.

- Кылем арын Татышлы ёросын 1000-лэсь трос йыруж шараяськиз. Прокуратураын ужасьёслэн кичӧлтэмзыя, соос палэнтэмын. Уж ӵектӥсьёс сярысь верано ке, соослэн уждун тыронын огъя 1 млн 295 сюрс манет пунэмзы вал. Та выллем «сигналъёс» бордын туэ но пыр-поч ужаломы: котькуд ужась уждунзэ дыраз басьтыны кулэ.

Санитарно-эпидемиологической, адямиос тросэн люкаськоно интыосын тылпулэсь утиськон законодательствоосъя зол ужамы. Кылсярысь, Шулган гуртысь нылпи юртэз эскерыса улон прокуратураын ужасьёс вылын. Отысь нылпиосын ми ӵем пумиськылӥськом. Вылысь Татышлыысь реабилитацияя центрысь пиналъёсын, отын ужасьёсын пумиськонъёс радъяськом. Вераны кулэ, янгышъёс дыраз шараясько но дыраз палэнтэмын луо.

Кылем арын прокуратурае анай-атайтэм нылпиос улон интыен герӟаськем шугъяськонъёссы пумысен вазиськизы, куинь нылпиос асьсэлы улон юрт басьтыны быгатӥзы.

Секыт уженыз сэрен пенсие вазьгес потон муген прокуратурае кочегар луыса ужась пиосмурт вазиськиз. Сое пенсие дырызлэсь вазь поттӥллямтэ вылэм. Эскеронъёс бере пиосмуртлэн куронэз быдэстэмын.

Кылем арын коррупциен нюръяськон ӧръя но трос ужано луиз. Та ласянь ёросын 48 йыруж шараяськиз. Прокуратура эскеронъёс радъяз, 20 адями кыл кутытэмын. Вераны кулэ, та ваньмыз прокуратураын ужасьёслэн быдэстэм ужъёссылэн пичи люкетэз гинэ.

- Ёросын законъёслэн быдэстӥськемзы пумысен кыӵе малпанды?

- Прокуратура, правоохранительной органъёс, интыысь аскивалтэт ӵошен ужамен, ёросын законъёс быдэстӥсько. Но ужпумъёс пумисько. Кылсярысь, дунтэк эмъюмъёс, сюресъёслэн тупатӥськымтэзы, ӵемысь вузы луымтэ пумысен, льготаоссы луэм адямиос музъем участок уг висъяло шуыса вазисько но мукет.

- Фидан Фанилевич, асьтэ сярысь но вакчияк вералэ вал.

- Татышлы ёросэ ужаны вуи Россиысь Генпрокурорлэн приказэзъя одӥг ар талэсь азьло. Кылем ар мон понна капчи вал шуыны уг луы. Выль интыын ужаны кутскон - интыысь кивалтэтэн, судейской корпусэн, правоохранительной органъёсын, общественной огазеяськонъёсын, СМИ-осын кусыпъёсты юнматон. Нош валтӥсь ужпум – ёросын улӥсьёслэсь прокуратураын ужасьёслы осконзэс будэтон. Татын газетъёслэн но люкетсы бадӟым луэ. Газетысь материалъёс пыр милям ужмы адӟиське. Адямиос прокуратурае вазисько бере, соос милемлы оско. 2020-тӥ арын 120 адями вазиськем ке, 2021-тӥ арын – 207 адями.

Ёрос прокуратура азе трос куронъёс, ужпумъёс пуктэмын. Соосты быдэстон бордын тыршо ужзэс валась, кылкутӥсь адямиос. Пусйымон ужез прокурорлэн воштӥсезлэн Э. Р. Гарифуллиналэн. Со, 25 ар ӵоже та удысын тыршыса, 2021-тӥ арысь 15-тӥ пӧсьтолэзе пенсие потӥз. Та дыре прокуратураын ужало прокурорлэн воштӥсез Р. Ф. Хуснуллин, прокурорлэн юрттӥсез А. Н. Русаков, валтӥсь ӧнерчи Л. Р. Саитова, водитель Р. З. Зуфаров. Соос азязы пуктэм ужпумъёссэс дыраз но быгатыса быдэсъяло, адямиослэн вазиськонъёссы эскериськытэк медаз кыле шуыса сюлмасько.

Автор:Миляуша Булатова
Читайте нас: