Атай юртын котьку шуныт

Соос пиналъёссэс лек сильтӧлъёслэсь но, урод синъёслэсь но утё. Анай-атайлэн яратонзы вормонтэм: вордэм пиналзы понна соос вань шуг-секытъёсты вормыны дась. Атай юртын котьку шуныт. Тон тодӥськод: татын тонэ ярато, возьмало. Соин, лэся, палэнын улыса но сюлэм котьку вордскем Татышлы ёросысь Калмияре, яратоно анаймы но атаймы доры куриське.
Атаймы али гинэ милемыз нылпи садэ, школае келяз вал кадь. Нош со дырысен тӥни олокӧня трос аръёс ортчемын ни. Табере ми, солэн куинь нылъёсыз, быдэ вуэмын, улон сюресэ йыг-йыг султэмын. Яратоно атаймы но ӵужатай луэмын ни. Пичи внукъёсыз понна со данъяськымон адями луэ. Атаймы сюлмызлэсь шунытсэ анаймылы, нылъёсызлы, эмеспиосызлы, внукъёсызлы жалятэк сётэ. Нош али ми сое бадӟым юбилееныз ӟечкыланы дыртӥськом. Атаймылы - Фануз Касимович Ивановлы - нырысетӥ толшоре 60 арес тырме. Та лыдпус ми понна осконтэм ке но, сюлэмын валаськом: аръёслэсь ортчемзэс шӧдыса вуттыны ик уг луы.

Тонтэк нунал но луысал бездыт,

Мар вань ӟечез - ваньмыз ик тон ванен,

Тон ми понна – шунтӥсь шунды.

Я, мед луоз на тазалыкед.

Мед быдэсмоз ваньмыз ик малпанэд.

Шудбур тыныд – ӝутыны вормонтэм,

Шумпотонэн мед вордӥськоз нунал,

Мед луоз со югыт но пилемтэм.

Яратоно анаймы но атаймы, ми туннэ тӥледлы та чебер улонмы понна пумтэм-йылтэм тау карон кылъёсмес вераськом. Шудо луэ! Тӥляд сюресады медаз пумиське шуг-секытъёс, тазалык, задор мылкыд мед луозы тӥледын артэ, котькудӥз нуналды шумпотон мед ваёз. Внукъёстылэн мусо серекъям куаразы тӥледлы азьпала вамыштыны вормонтэм кужым мед сётоз. Выль арен тӥледыз, гажано анаймы но атаймы! Вуоно арды шумпотонъёслы, пумиськонъёслы, тодматсконъёслы узыр мед луоз. Нош ми, нылпиосты, тӥлесьтыд улондэс ӟеч иворъёсын яркытгес карыны тыршомы. Яратӥськом но данъяськиськом Тӥледын!
Нылъёсты, эмеспиосты, внукты но внучкаосты.