Башкортостанысь удмуртъёслэн национально-культурной центрзылэн Кенешез люкаськылӥз

Отын 2021-тӥ арын быдэстэм ужъёс сярысь вераськизы. Жаляса верано, тросэз малпанъёс, коронавирусэн сэрен, быдэстӥськытэк кылизы. Но шумпотоно, туэ, кылсярысь, нылпи творчествоя фестиваль, «Чеберина» конкурс но мукет кӧня ке со выллем бадӟым ужрадъёс ортчизы шуыса.  

БР-ысь удмуртъёслэн Кенешезлэн ёзчиосыз куд-ог ужрадъёсты вуоно аре выжтыны ӵектӥзы. Соос пӧлы, кылсярысь, пыризы «Ӝужась кизилиос», «Дуно марӟанъёс» конкурсъёс, дано удмуртъёслэн пумиськонзы. Огкылын вераса, вуоно арын Башкортостанысь удмуртъёсты трос пӧртэм ужрадъёс витё. Секыт висён гинэ медаз люкеты малпанъёсты быдэстыны.