Проект ӟеч ужъёс быдэстыны юрттэ

«Атайсал» общественной проект Башкортостанлэн Тӧроезлэн Радий Хабировлэн инициативаезъя туэ тулысысен быдэстӥське. Проектлэн валтӥсь ужпумез – вордскем шаеред понна пайдаё ужъёс лэсьтон, кыӵе ке но ужъёсы аслэсьтыд люкеттэ пыртон.

Вылысь Тыхтемысь культура юртысь культорганизатор Илюза Камидуллина вера:

- Гурт калык ӵошен быдэстоно ужъёсы мыло-кыдо пыриське. Берло дыре субботникъёс арнялы быдэ сямен радъясько. Гуртамы кылдэм ужпумъёсты кенешыса быдэсъяськом. Кылсярысь, туэ «Атайсал» проектэ пыриськыса, огъя кужымен гуртмы вӧзысь Вылысь ошмесэз тупатӥм. Котыраз трос аръем сяськаос, писпуос мерттӥм, ӟеч ужлы гуртоосмы коньдонзэс ӧз жалялэ.

Вылысь Тыхтемын (калыкын Шыльныр шуо) ФАП, культура юрт, магазин, почта ёзэт ужало. Татын 88 корка лыдъяське, 68-аз гинэ улӥсьёсыз вань. Нылпиос бускель гуртъёсын – Кельтейысь но Улысь Качмашысь школаосын – дышетско.

Туэ Вылысь Тыхтем гурт «Трезвое село» конкурсэ но пыриське.