Туннэ - Гуртысь нылкышноослэн нуналзы

Янаул ёросысь Андреевкаысь Фанила Гаязова - гуртэз сярысь сюлмаськись удмурт кышномурт. Со калыкен огкыл шедьтэ, гуртлэн улоназ мыло-кыдо пыриське.
- Мон Герейысь (авт.: Андреевкаез калыкын озьы шуо) Сагитлэн но Фаниялэн нырысетӥ нылпизы луисько. Татын вордӥськи, татысь ик кузпалме шедьтӥ, - ас сярысьтыз тодматыса вера Фанила Сагитовна. – Ямадыысь школаез йылпумъяса, Сарапулэ заводэ ужаны интыяськи. Отын кема ӧй улы, сюлмы вордскем гуртам кыскиз. Бертыса вуз карисьлы дышетски но магазинын ужаны кутски.
Фанила Гаязова ассэ пӧртэм удысын эскерем. Со фермаын кунян утисьын но, амбарын весовщицаын но, нефтепаркын оператор-лаборантын но тыршем. Пӧртэм интыосын ужам ке но, ноку гуртэзлэсь, отын улӥсь калыкезлэсь палэнскымтэ. Али но со, пенсие потыса, гуртэз понна «висе». «Гурт быре, али гинэ куинь корка ворсаськиз. Уж ӧвӧл, пиналъёс но ӧвӧл ни», - сюлэмшугъёссэ вера Ф. Гаязова.
Фанила Сагитовна куатетӥ арзэ ни Ямады гурт поселенилэн муниципал округезлэн депутатэз луэ. Соин солы пӧртэм юанъёсын, ужъёсын вазиськисьёс трос. «Кылдэм ужпумъёсты асьмеос ик быдэстыны тыршиськом. Ӧм ке быгатэ, Ямады гурт поселенилэн администрацияз вазиськиськом, - вера со. - Калыкен ужаны секыт ке но, ужпумъёсты ӵошен быдэстыны тыршиськом. Субботникъёсы, кылсярысь, пиналэз но, мӧйыез но потэ. Тямыстон куинь аресъем песянайёс но ужлэсь уг палэнско. Герей шур дурез, сюрес дуръёсты, урамъёсты, ошмесъёсты чылкыт но утялтыса возьыны тыршиськом». Фанила Гаязова гуртысьтызы «Зангари» калык ансамбле но мыло-кыдо пыриське. Кызь арлэсь кема ни со татын кырӟа-эктэ. Фанила Сагитовна коллективзы сярысь шуныт кылъёсын гинэ вазиське. «Ансамбле ветлӥсьёсын, али ми дас кык кузя, тупаса но огкылысь улӥськом. Милемын Ралия Гафиуллина кивалтэ. Со – егит но ӟеч кивалтӥсь. Солэн тыршемез улсын туэ фольклориадае пыриським. Тулыс Вуж Вараше, Нанядые, Шудеке, Каймашабаше концертъёсын потамы. Отын поттэм коньдонэнымы костюмъёс вурытыны кенешим. Гуртын ортчоно ужрадъёсы но ӵошен дасяськиськом, ӝӧквылмес но пӧръёсын ӵош узырмытыны тыршиськом, нокин юрттӥськытэк палэнэ уг кыльы».
Фанила Сагитовна кема аръёс ӵоже нефтепаркын тыршем Юрий кузпалыныз 38 ар уло ни. Соос кык нылъёс будэтӥзы. Елена нылзы Янаулэ улыны интыяськиз, нош Эльвиразы – Москваын. Соос анаен атайзылы ньыль внукъёс кузьмазы. Гаязов кузпалъёс гидкуа трос пудо вордо. Гужем азбарзэс чипы-курегъёс, ӟазегъёс, ӵӧжъёс, куркаос шулдырто. «Тужгес но ӵӧжъёсты утьыны яратӥсько. Соослэн куаразы тонэн вераськем кадь потэ. Пудоослы турын нылъёсын но эмеспиосын ӵош дасяськом, - вера Фанила апай. – Нылпиос милемлы юртто, нош ми - соослы. Туннэ нуналэ ми асьмеды шудоен лыдъяськом». Гуртысь кышномурт вылын возиське улон. Со уж дураз но вутскоз, семьяезлы но саклык висъялоз.

Туспуктэмез Алексей САМИРЗЯНОВЛЭН.