Кык пуныос вылэ кабан урдскем...

Уж дураз пумиськем учыръёсыз сярысь вера «ВетДоктор» клиникаен кивалтӥсь Александр Шайсламов

Александр Виталиевич – егит ӧнерчи. Со Максим школаез пыр потэмез бере, 2018-тӥ арын Ижевскысь гурт хозяйствоя кун академиез йылпумъям. Куинетӥ курсын дышетскыкуз ик ассэ та удысын эскерем – пудо эмъян частной клиникаын эмчилэн ассистентэз луыса ужам.
- Дышетсконме йылпумъям бере, армие ветлӥ. Собере Янаулысь ветстанциын ӝыны ар ужай. Нош 2020-тӥ арын аслым клиника усьтон сярысь малпанэ кылдӥз. Ваньмыз малпамтэ шорысь ӝог быдэсмиз. Июнь толэзьлэн пумаз ужбергатӥсьлы зарегистрироваться кари, арендалы инты шедьтӥ, оборудование но эмъюмъёс басьтыса, уж борды кутски. Та ужам нырысетӥ вамышъёс лэсьтыны юрттӥзы ёрос администрация но анаен атай, - вера А. Шайсламов.
 Александр Виталиевич клиникаын огназ тырше. Соин солы пӧртэм ласянь усто эмчи луоно: синъёсты, пиньёсты эмъяно, перевязкаос, инъекциос, операциос лэсьтоно. Ветклиникаын профилактической осмотрлы но бадӟым саклык висъяло. Дорысь пудо-животъёслы пӧртэм висёнъёслэсь вакцинаос пуктыло. 
- Мон тросгес пуныосын но коӵышъёсын ужасько. Куд-ог дыръя хомякъёсты, комакъёсты, попугайёсты эмъяны вайыло. Соосты но учкисько.Кылсярысь, туэ толалтэ кык пуныос вылэ кабан урдскем. Соослы операция лэсьтытэк ӧз луы. Солэсь азьвылгес вень ньылэм коӵышез ваизы. Солы но операция кулэ луиз. Шумпотоно, пуныос но, коӵыш но бурмытскизы. 

Александр Виталиевич быръем удысаз кема аръёс уг ке но тыршы, ужез солы туж кельше. Со котьку, котькуд вазиськисьлы юрттыны дась.