Гуртъёсысь калыкен вакциналэн кулэлыкез сярысь верасько

Республикаямы «Здоровое село» проект быдэстӥське. Отын вормисьёсты шараян понна гуртъёсын улӥсьёслэсь коронавируслы пумит вакцина пуктэмзэс эскерозы: калыклэн 80 процентлэсь тросэз вакцина басьтэмын луыны кулэ.  Проект 31-тӥ августозь кыстӥське. Та нуналъёсы республикаысьтымы гуртъёсын со пумысен кенешонъёс радъясько.

Татышлы ёросысь Улысь Балтач гурт поселение пырись гуртъёсын но кенешонъёс ортчыло. Кылсярысь, одӥгез пумиськон Кызыл-Ярын луиз. Татын коронавируслы пумит прививкалэн кулэлыкез сярысь вераськиз фельдшер Р. К. Шаймиева. Кенешонын нылпиослэсь площадказэс тупатон, ППМИ проектъя трактор басьтон, кузётэм пуныосын нюръяськон сярысь но вераськизы.