Купченеевоысь удмуртъёс доры "Ялгат" калык ансамбль концертэн вуылӥз

Таӵе пумиськонэз радъянэ бадӟым понӥз Надежда Головина – Купченеевоын будэм кышномурт.

«Живи, село родное!» концертэ быдэс гуртысь калык люкаськиз. Кырӟасьёс котькуд учкисьлэн сюлэмаз сюрес шедьтӥзы. Соосты сцена вылысь зол кичабонъёсын келязы. Учкисьёс понна ӟуч, мордва но удмурт кырӟанъёс чузъяськизы. Со сяна, чиган эктонэн паймытӥзы, пуштросо кылбуръёсын сюлэмзэс бугыртӥзы. Нош собере культорганизаторлэн но аккомпаниаторлэн Надежда Головиналэн кивалтэмез улсын Раиса Макарова, Валентина но Елена Головинаос, Любовь Белякова, Надежда Чукаева но Людмила Карныш «Три девицы под окном» крезьгуро сценка возьматӥзы.