Гожтод-а астэ удмурт шуыса?

Соку Башкортостанын удмурт кыл быроз, сое дышетэмысь дугдозы, пиналъёс ӟуч сямен вераськыны кутскозы шуыса малпаськись  ик ӧй вал на.  «Ӟуч кылэз ӵошатоно ке, удмурт кылэз дышетыны секыт», «Малы со кулэ?», «Удмурт кылэз дышетыны котьку мылкыды вань вал, анай-атае ӧз дышетэ», - пӧртэм малпанъёс чузъясько телевозьматонын.

Аръёс ортчизы. Удмурт Элькунын удмурт кылэз дышетон ласянь шӧдскымон воштӥськонъёс луизы. Татын удмурт кыллэн данэз ӝутске. Башкортостанын но ваньмыз интыяз уг сылы. Зэм, татын югдур мукетгес: пиналъёс ӟучомо, анай-атайёс нылпиосынызы ӟуч сямен верасько… Удмурт Элькунлэн сюлмаськонэз аръёс ортчыса башкир музъеме но вуиз. «Гуртмы быдэсак удмурт. Нош нылпи садамы одӥгез нылмы гинэ удмурт сямен вераське. Мукетъёсыз уг но валало, быдэсак ӟучомемын ни. Анай-атайёсынызы трос пол со сярысь вераськылӥмы. Удмурт кыл кулэ ӧвӧл, шуо. Ӟучомем пиналъёсмылы луыса, нылпи садамы мурт кылын вераськоно луиськом», - вера республикаысьтымы одӥгез воспитатель.  Та выллем сюлмаськонзэс верало куд-ог школаосысь удмурт кылъя но литературая дышетӥсьёс но.

Удмурт нылпи ӟуч сямен вераськиз ке но, со удмурт кылын малпаськемысь уз дугды. Озьыен, удмурт кыл быдэс улонзэ соин артэ вамыштоз. Озьы бере, малы удмурт кылмес ватонэз? Гожты: «Мон -  удмурт! Нылпиосы - удмуртъёс!»