-4 °С
Лымы
Антитеррор
Вань иворъёс
Новости
8 августэ 2021, 16:30

Удмурт но бигер кыл тунсыко Москваысь но Гамбургысь кылчиослы

Татышлы ёросын кылъёсты эскеронъя экспедиция ужа.

Удмурт но бигер кыл тунсыко Москваысь но Гамбургысь кылчиослы
Удмурт но бигер кыл тунсыко Москваысь но Гамбургысь кылчиослы

Удмурт историяя но культурая центрлэн гожъямъёсызъя тодӥськоды ни, Татышлы ёросысь удмурт гуртъёсын ужа МГУ-ысь филология факультетысь теоретической но прикладной лингвистикая ёзэтлэн экспедициез ужа шуыса. 16 кузя студентъёс, кылчиос-тодосчиос Вуж Кызылъяр, Ивановка, Улысь Балтач, Выль Татышлы, Бальзюга, Калмияр, Уразгильды гуртъёсысь информантъёсын ужазы ни. Котькудӥзлэн экспедицие лыктэмъёслэн - асьсэлэн темазы, кудъёсызъя соослэн нимысьтыз юанъёссы дасямын. Кивалтэ экспедициен филологи тодосъя кандидат, Ӟуч кылъя институтысь научной сотрудник Егор Владимирович Кашкин. Кылчиослэн Татышлы ёросын ужамзы сярысь газетамы материал вуоно номере потоз.

Коллегаосызлэсь татын луэмзэс тодыса, кык нуналлы Башкортостанэ ужаны лыктӥз эшшо мукетыз кылчи - филологи наукаосъя кандидат, Гамбургысь Финно-угороведениея/уралистикая  институтысь научной сотрудник Тимофей Архангельский. Тимофейлэн тунсыкъяськонэз али герӟаськемын удмурт кылысь послелогъёсын. Толон со ужаз Вуж Кызылъярысь удмурт информантъёсын, нош туннэ мылкыд кариз бигер информантъёсын вераськыны. Кин туэ экспедицилэсь ужзэ радъя, валалозы: капчи уж вылымтэ учёнойёслы информантъёс шедьтыны. Вазиськи "Подслушано Татышлы и Татышлинский район" группае но, тодмоосылы но гожъяй, жингыръяй, ёрос центрысь бигер информантъёс ӧз шеде. Уразгильдыысь та гуртэ бызем кык бигер кенъёс гинэ пумит ӧз луэ куноен вераськыны. Т. Архангельскийлэн ужан экспедициез азьланьтӥськоз Удмуртиысь но Татарстанысь Грах но Бавлы ёросъёсын.  

Кинлы тунсыко потоз, лыдӟелэ та материалэз, кудзэ дасян бордын тыршиз Тимофей Архангельский но: https://postnauka.ru/longreads/155706

Туспуктэм: Егор Кашкин.

 

Автор:Анна Байдуллина
Читайте нас: