Татышлы ёросысь Уразгильды гуртын Вормон нуналлы сӥзем митинг ортчиз

Быдӟым Атыкай оже та гуртысь 109 ожгарчи кошкем, соос пӧлысь 73-ез пыраклы ож бусые кылемын. Туннэ нуналэ Уразгильдыын но, Выль Татышлы гурт поселениын но одӥг ветеран но ӧвӧл ни. Улэп на куинь ож мышкын тыршем апайёс. Соос но война вакытысь нылпиос луизы туннэ ӧтем куноос Уразгильды гуртысь Быдӟым Атыкай оже быремъёслы сӥзем обелиск азьын ортчем митингын.
Радэн сыло школаын дышетскисьёс. Соослэн киязы - пересь песятайёссылэн-ӵужатайёссылэн туспуктэмъёссы - "Вунонтэм полк". Митинге люкаськемъёсыз ӟечкылазы Выль Татышлы гурт поселенилэн тӧроез Николай Рахимъянов, Уразгильды школалэн директорез Ильшат Минязев, БР-ысь НКЦ-лэн ёзчиез Татьяны Шайбакова. Соос ваньзы пусйизы кыӵе дунын та ожын вормонлэсь сётӥськемзэ но ож мышкын тыршисьёслы, война вакыт вордӥськемъёслы юн тазалык сӥзизы. Обелиск доры сяська понӥзыУразгильды школаын тужгес ӟеч дышетскисьёс но котьма ласянь азьветлӥсьёс, апаен сузэръёс Екатерина но Анастасия Хатиповаос. Кыл сётӥзы дуно куноослы но - гуртысь мӧйы апай-агайёслы. Менкат Садиева аслаз пичи дырыз, анаезлэсь сое сьӧраз ужаны нуллэмзэ, сютэм улонэз адӟемез, пӧртэм турын-куаръёсын кӧтсэс тыремзы сярысь мадиз. Митингын чузъяськизы кылбур чуръёс, кырӟанъёс, оже бырем гуртоосыз буре вайыса, одӥг минут чус но улӥзы.