Башкортостан гудырикошкон толэзе «Сохраним лес» акцие пыриськыны дасяське. Со куинетӥ ползэ радъяське.
Та нуналъёсы «Сохраним лес» акцие пыриськонлы дасяськонъя заседание ортчиз. «Экологической акциез ӟеч радъян понна мерттыны писпуос, куакъёс дасяломы», - вера БР-ысь гурт хозяйствоя министрлэн воштӥсез Ильгиз Фаткуллин.
Акцие егитъёс но – студентъёс, дышетскисьёс – пыриськозы шуыса малпало. Со сяна, вылӥ кивалтӥсьёс, организациосын но предприятиосын ужасьёс писпу мерттонэ трос кужымзэс понозы. Тодады вайытӥськом, «Сохраним лес» акция 2019-тӥ арын куарусён толэзе кутскиз шуыса. Со сяна, республикаын «Сад памяти» акция но быдэстӥське. Соослэн валтӥсь ужпумзы – нюлэсъёсты утён.