"Лудорвай" калыкез фестивале люказ

Фестиваль арысь аре пӧртэм регионъёсысь крезьгур коллективъёсты огинэ люка. Туэ но «Лудорвай» музей-заповеднике Удмурт Элькунысь гинэ ӧвӧл, Башкортостан но Татарстан Республикаосысь куноос вуизы. Соос калыксылэсь вашкала дырысен туннэ нуналозь возиськись сям-йылолъёссэ, лулчеберетсэ паськыт возьматӥзы. Со сяна, фестиваль Чечы спасэн огазеямын луэ. Соин та нуналэ мушен вырыны яратӥсьёс ужзылэн емышъёсыныз тодматӥзы. Ужрадэ люкаськемъёсты  беризь но пӧртэм турынъёслэн шӧмъёсынызы пыӵам чечыен куноязы. Озьы ик фестивале пыриськисьёс тунсыко мастер-классъёсын выль быгатонлыкъёс басьтӥзы, нош нылпиос пӧртэм шудонъёсы пыриськизы.

Туэ фестивальын Башкортостан Республикаез Янаул ёросысь Шудек гуртысь «Тюрагай» ансамбль яркыт возьматӥз. Сцена вылын соос кырӟан-эктонъёссы пыр зэмос удмуртлыкез адӟытыны быгатӥзы. Шудекъёс люкаськемъёслы капчи но шулдыр мылкыд кузьмазы.

Фото: Ангелина Менгафарова.