Усточиос ёрос картаез пужыятӥзы

Проект улсын Янаул ёросысь 18 гурт поселениосысь лулчеберет удысын ужасьёс бадӟым уж бордын тыршизы. Киужлы усточиос, пӧртэм амалъёсты ужазы кутыса, гурт поселениоссылэсь картазэс пӧрмытӥзы. Пужыятыса лэсьтэм картаын котькуд гурт аспӧртэмлыко луиз. Ужрадэз радъясьёслэн кылъёссыя, ёрослэн чеберъяса лэсьтэм картаез татын улӥсь калыклэсь узыр лулпушсэ возьматэ. Озьыен, ёросын чеберлыкез валась, котьмалы быгатӥсь усточиос уло но вордскем интызэс данъяны быгато.

Вераны кулэ, проектэз йылпумъяса, та выллем бадӟым уж бордын тыршисьёсты Башкортостан Республикаысь калык творчествоя центрлэн  тау карон гожтэтэныз пусйизы.  Удмуртъёс но проектлэсь палэнэ ӧз кыле. Кылсярысь, Шудек гурт поселенилэсь картазэ Л. В. Давлетшина пужыятӥз. Нош ёрослэсь огъя картазэ лулчеберетъя ёзэтысь ӧнерчи Л.М. Нуруллина пӧрмытӥз.

Фото: Шудекский СДК