Вылысь Татышлыын "Букет прекрасных поздравлений" ужрад ортчиз

Отын трос шуныт кылъёс веразы ёросысь нылкышноос сярысь. Уго соос пӧртэм удысъёсын тыршо, усто быгатонлыкъёсынызы висъясько. Та нуналэ тросэз нылкышноосты данъетъёсын но пусйизы. Палэнэ ӧз кыле кибашлыос но. Татышлы ёросысь культурая управлениен кивалтӥсь Р. Ахметов сцена вылэ ӧтиз "Вышитая карта Башкортостана" проектэ пыриськисьёсты. Руслан Мавлетьянович соосты Калык творчествоя республика центрлэн дипломъёсыныз пусйиз. Шумпотоно, картаез лэсьтонэ Бигиней, Улысь Балтач гуртъёсысь усточиос Эльвира Гильманшина, Елена Хазипова, Лира Зиядуллина но пыриськизы шуыса.
«Вышитая карта Башкортостана» проектэз Республикаысь Культурая министерство, Калык творчествоя республика центр, муниципал ёросъёс но кибашлыос республикалэн тӧроезлэн Грантэз улсын дасязы. Картаез дасянэ Уфаысь но регионысь 25-лэсь трос усточиос пыриськизы. Отын республикаысь 54 ёросъёс возьматэмын. Пужыятӥсьёс бисерен, лентаосын но мукет со выллем арбериосын пайдаяськизы.

Фото: МБУК МКДЦ Татышлинский район РБ