Арганчиос шулдыр удмурт гурзэс кисьтӥзы

Семьялы сӥзем арын ортчись "Гербер" гурлы сӥземын вал. Гур коркаез шунтэ, адямиез сюдэ, котыраз быдэс семьяез люканы быгатэ угось. Валтӥсь сцена но Гурлы пӧрмиз.
Люкаськем калыкез Кун Думаысь депутатъёс Олег Гарин но Лариса Буранова, Удмурт Элькунысь Кун Кенешлэн кивалтӥсезлэн воштӥсез Татьяна Ишматова, Йӧскалык политикая министр Эдуард Петров но вань удмуртъёслэн «Удмурт Кенеш» огазеяськонзылэн тӧроез Андрей Ураськин ӟечкылазы.

«Гербер» улсын трос пӧртэм конкурсъёс ортчизы. Одӥгез, кылсярысь, «Усто арганчи но капчи мылкыд кузьмасьёс» нимаськиз. Отчы Янаулысь усто арганчиос Александр Ахмадуллинэн Леонид Хазипов но пыриськизы. Соос «Инвис» ансамбльын кырӟасьёсын ӵош шулдыр удмурт кырӟанъёсты кырӟазы. «Инвис» ансамбльлы Удмурт Элькунысь «Гербер» шулдыръяськонын радъяськем калык творчествоя «Усто арганчи но мылкыд кузьмасьёс» элькун фестиваль-вожвылъяськонэ мыло-кыдо пыриськемез но удмурт культураез азинтэмез понна тау карон гожтэт сётӥзы. Нош арганчиосты куинетӥ степенё лауреатлэн дипломеныз пусйизы.