Республикаын историяя но культурая центръёсты выльдо

Матысь дыре Аургазы ёросын чувашъёслэсь историяя но культурая центрзэс усьтозы. Бӧрысь таӵе шумпотымон ивор вите удмуртъёсты но. Та нуналъёсы Татышлы ёросысь Выль Татышлыын историяя но культурая центрез тупатон борды кутскизы. Со татысь культура юртэн одӥг липет улэ интыяськемын. Тупатӥськон ужъёсты быдэстыны Башкортостан Республикалэн бюджетысьтыз 173,3 млн манет коньдон висъяськиз. Со юртлэсь липетсэ, фасадзэ, отопленизэ воштыны но трос мукет та выллем ужъёсты быдэстыны тырмоз. Культура юрт но удмуртъёслэн историяя но культурая центрзы вакчи дыр куспын тодмантэм воштӥськозы.

Кылем арын толшор толэзе Татышлы ёросэ Башкортостанлэн тӧроез Радий Хабиров вуылӥз. Со Выль Татышлыысь культура юртэ пыраз. Татышлы ёрос администрациен кивалтӥсь Фанур Шайхисламов солы удмуртъёслэсь историяя но культурая центрзэс выльдонэн герӟаськем ужпумъёс сярысь вераз. Радий Фаритович проект дасян, солы коньдон висъян бордын ужаны куриз. «2022-тӥ арын Мишкиноын поръёслэн историяя но культурая центрзы усьтӥськиз. Азьланяз мукетъёсаз но ИКЦ-осын тупатон ужъёс лэсьтыны тыршомы. Та уж республикаямы улӥсь калыкъёслэсь культуразэс утён вылысь лэсьтӥське», - вераз соку Радий Фаритович. 

Со дырысен татын трос уж лэсьтэмын: проект дасямын, госэкспертиза ортчытэмын. Выльдэм центрын азьланяз трос пӧртэм ужрадъёс ортчылозы. Сое 2025-тӥ арын «Дуно марӟанъёс» регионъёс куспысь фестиваль улсын усьтыны чакламын. Со дасэтӥ ползэ ортчоз. Отчы пӧртэм интыосысь фольклор коллективъёс пырисько. Фестиваль Татышлы ёрослэн брендовой ужрадъёсыз пӧлы пыртэмын.

 Выль Татышлыысь культура юрт 1988-тӥ арын ӝутэмын. Аръёс ӵоже отын олокӧня ужрадъёс, концертъёс ортчемын. Тупатэм юрт эшшо но трос калыкъёсты огазеялоз.

Фото: Удмуртский историко-культурный центр