Калмиярын «Выль» праздник ортчиз

Туэ но выль емышъёсты, бакча сиёнъёсты сӥлы карыса, ужез данъяса, Татышлы ёросысь Калмияр гурт палась возь вылын мыло-кыдо шулдыръяськон ортчиз. Отчы нылкышно клублэн ёзчиосыз, гуртысь культура юртын ужасьёс, ИКЦ бордын ужась «Ренбик» клубе пыриськись нылпиос, Москваысь МГУ-ын дышетскись студентъёс вуизы. Соос удмурт дэремъёсын лыктӥллям, киосазы - удалтэм емышъёссы, ческыт пыжиськем-пӧръёссы.

- Выль емышъёслы туж шумпотӥськом. Будэтэм бакча-сиёнъёсмы быдэс арлы мед тырмозы. Ю-няньмы но мед удалтоз, - шуо ужрадэ лыктэм нылкышноос.

Праздник туж шулдыр ортчиз. Возь выл тыр крезьгур, кырӟанъёс чузъяськизы. Та нуналэ пӧртэм шудонъёс, конкурсъёс но радъяськизы. Отчы бадӟымъёс но, пичиос но мылысь-кыдысь пыриськизы. «Калмияръёслы шулдыръяськонэз радъямзы понна бадӟым тау кылъёсмес вуттӥськом», - вера БР-ысь удмуртъёслэн историяя но культурая центрысьтызы валтӥсь ӧнерчи Ирина Самигулова.

Фото: Удмуртский историко-культурный центр