Бадӟым Гондыр 450 ар тырмонзэ пусйиз

Татын «С любовью к родному селу» праздник ортчиз. Со Бадӟым Гондырлэн кылдэмез дырысен 450 ар тырмонлы сӥземын вал. Гуртлэн юбилеез улсын «Сабантуй» ужрад но радъяськиз.Бадӟым гондыръёс куноосты ческыт пӧръёсынызы, капчи мылкыдын пумитазы.

Гурт калыкез праздникен ӟечкыласа вераськизы Куеда округ администрациен кивалтӥсь Флорид Бадртдинов, Бадӟым Гондыр территориальной ёзэтлэн кивалтӥсез Татьяна Шарибзянова, Куеда округысь Думалэн депутатэз Евгений Марданов но мукетъёс.

Ужрадын гуртысь гажано улӥсьёсты, ож мышкын тыршемъёсты, ожтыл нылпиосты, боевой действиосы пыриськем ветеранъёсты, мобилизованнойёслэсь семьяоссэс, 50 ар ӵошен улэм кузпалъёсты, гуртысь тужгес арлыдоосты данъязы.

Гуртысь культура паркын лумбыт шулдыр крезьгур чузъяськиз. Трос конкурсъёс, ӵошатсконъёс, шудонъёс радъяськизы.Праздникез Удмурт Элькунысь кырӟасьёс Алёна Тимерханова но Иван Котельников, гуртысь творческой ансамбльёс шулдыртӥзы.

Праздник дискотекаен но фейерверкен йылпумъяськиз.

Фото: Администрация Куединского муниципального округа